नेपाल एयरलाइन्सले  अन्तर्राष्ट्रिय उडानको हवाई टिकट आजदेखि  अनलाइनबाट सुरु गरेको छ। अव निगमको टिकट लिन चाहने यात्रुले अन्तर्राष्ट्रियस्तरमा प्रचलित भुक्तानी कार्ड प्रयोग गरी विश्वको जुनसुकै भागबाट पनि टिकट बुकिङग गर्न सक्ने छन् ।

संस्कृति पर्यटन तथा नागरिक उड्डयन मन्त्रालयका सचिव एवं निगम संचालक समितिका अध्यक्ष शंकर प्रसाद अधिकारीले आजबाट अनलाइन बुकिङ्ग सेवाको सुरुवात गरेका हुन् । उनले व्यवस्थापन सुधारको एउटा अंग सूचना प्रविधिको पूर्ण एवं उपयोगी प्रयोग पनि भएको बताउँदै त्यस तर्फ थप प्रयास आवश्यक रहेको बताए ।

हाललाई विदेशी मुद्राको अन्तर्राष्ट्रिय कार्डको प्रयोग गरी टिकट बुकिङ्ग हुनेछ भने नेपाली मुद्रामा पनि चलाउन प्राविधिक पक्षमा केही परिवर्तन गरी अनलाइन बुकिङ्ग प्रणालीमा आवद्ध गरिनेछ । यसका लागि केही समय लाग्ने निगमले जानकारी दिएको छ ।

सो अवसरमा महाप्रवन्धक सुगतरत्न कंसाकारले निगम नयाँ  प्रविधिलाई सेवामा समावेश गरी पूर्ण प्रतिस्पर्धामा जाने योजना सहित अघि बढेको बताए । उनले आफ्ना ग्राहकहरुलाई अनलाइन बुकिङ्गमा समावेश गर्न पाएकोमा प्रसन्नता व्यक्त गरे ।

भारतको वर्ड इन्फर्मेसन सिष्टम तथा थाइल्याण्डको टुसीपिसी कम्पनीको प्राविधिक सहभागितामा इन्टरनेट बुकिङ्गको थालनी गरिएको निगमले जानकारी दिएको छ ।