प्रदेश नं ४ को बुधबार बसेको प्रदेशसभा बैठकमा दुई प्रतिवेदन प्रस्तुत भएको छ ।

बैठकमा प्रदेशसभा सदस्य एवं विधायन समितिका ज्येष्ठ सदस्य कृष्णचन्द्र नेपालीले प्रदेश सरकारका सार्वजनिक लिखत प्रमाणीकरण कार्यविधि सम्बन्धमा बनेको विधेयक र स्थानीय तहका पदाधिकारी तथा सदस्यले पाउने सुविधासम्बन्धी विधेयक विधायन समितिको प्रतिवेदनसहित सभामा प्रस्तुत गर्नुभयो ।

पृथ्वी राजमार्गको स्तरोन्नतिमा जोड
प्रदेशसभाको बुधबारको बैठकमा शून्य एवं विशेषमा बोल्ने सदस्यले पूर्वाधार विकासको अभावमा सम्भावनायुक्त स्थलसमेत ओझेलमा परिरहेको भनी ध्यानाकर्षण गराउनुभयो । सदस्य आशा कोइरालाले प्रदेश नं ४ को केन्द्र पोखराको मुख्य प्रवेशद्वारका रुपमा रहेको पृथ्वी राजमार्गको स्तरोन्नति तदारुकताका साथ हुनुपर्नेमा जोड दिनुभयो ।

प्रदेश सदस्य इन्द्रधारा विष्टले मुक्तिनाथलाई विशेष धार्मिक क्षेत्र घोषणा गरी प्रचारप्रसारको माध्यमबाट धार्मिक पर्यटन प्रवद्र्धनमा जोड दिइनुपर्ने उल्लेख गर्नुभयो । सदस्य इन्द्रलाल सापकोटाले धवलागिरि अञ्चल अस्पतालमा अपर्याप्त जनशक्तिको कारण यस क्षेत्रका सर्वसाधारणलाई उपचारमा कठिनाइ परेकाले दरबन्दीअनुसारका चिकित्सक र अन्य प्राविधिकको व्यवस्था गर्न माग गर्नुभयो ।

सदस्य कृष्ण थापाले जलस्रोतको भरपूर उपयोगसँगै सडक सञ्जाल विकास एवं विस्तारमा पहल गरिनुपर्ने बताउनुभयो । सदस्य कृष्णचन्द्र नेपालीले नारायणी नदीको किनारामा अस्थायी बसोवास गर्दै आएका लोपोन्मुख बोटे र मुसहर जातिका सर्वसाधारणलाई स्थायी वसोवासको व्यवस्था गरिनुपर्नेमा जोड दिनुभयो ।

विशेष समयमा सदस्यद्वय कृष्णबहादुर थापा र विन्दुकुमार थापाले मणिपाल शिक्षण अस्पतालमा सेवा सुविधाको मागसहित धर्नामा बसेका कर्मचारीमाथि सोमबार भएको प्रहरी हस्तक्षेपको विरोध गर्दै घाइते भएकाको उपचारसहित क्षतिपूर्तिको माग गर्नुभयो ।

अविवाहितालाई सामाजिक सुरक्षा भत्ता माग
सदस्य कोपिला बोहराले पोखरा–बागलुङ राजमार्गको स्तरोन्नति गरिनुपर्ने माग राख्नुभयो । उहाँले अविवाहित महिलालाई सामाजिक सुरक्षा भत्ता प्रदान गर्नुपर्ने बताउनुभयो । सदस्य दीपक कोइरालाले प्रदेशसभामा भौतिक संरचना कमी भएको र खर्चिलो भएको बताउँदै साविक लेखनाथ नगरपालिकाको कार्यालयलाई उपयोग गर्नेतर्फ ध्यानाकर्षण गराउनुभयो ।

सदस्य हरिशरण आचार्यले फेवाताल वर्षेनी खुम्चँदै गएकाले यसको संरक्षणमा जोड दिनुपर्ने बताउनुभयो । सदस्य दिलमाया रोका मगरले बागलुङको कृषि फर्ममा आगलागीबाट भएको रु ७६ लाख बराबरको क्षतिको उचित क्षतिपूर्ति पीडितलाई दिनुपर्ने माग गर्नुभयो ।

सदस्य पियारी थापाले महिला र बालिकामाथि हुने बोक्सी र बलात्कार जस्ता अमानवीय व्यवहारको रोक्नका लागि कडा कानून बनाउनुपर्ने बताउनुभयो । सदस्य चन्द्रमोहन गौचनले कोराला नाका सञ्चालनसहित युरेनियमलगायत महत्वपूर्ण प्राकृतिक स्रोतको उपयोगका लागि चीन सरकारसंँग कूटनीतिक पहल शुरु गरिनुपर्ने बताउनु भयो । सदस्य भागवतप्रसाद मल्लले स्थानीयस्तरमा रहेका अधूरा योजना सम्पन्न गर्न बजेटको व्यवस्था गरिनुपर्नेमा जोड दिनुभयो ।

प्रदेश ४ मा मन्त्रिपरिषदले पूर्णता पायो