राप्रपा राप्रपा

  • राप्रपा
  • राप्रपा

विभाजन, सैद्धान्तिक अन्योल र नेताहरुको इगोले खुम्चदै राप्रपा

13 December, 2017 11:21 | राजनीति | comments | 24900 Views

राप्रपा

जन्म नै दुई चिरामा भएको तत्कालीन राष्ट्रिय प्रजातन्त्र पार्टी अहिले पनि तीनचिरामा छ । पंचायतकालीन राजनीतिका हस्तीहरुले नेतृत्व गरेको राप्रपाका नेताहरुले आफूलाई राष्ट्रवाद र उदार लोकतन्त्रको पक्षधर दावी गरे पनि उनीहरुको सैद्धान्तिक विचलन र नेताहरुको प्रतिष्ठाको लडाईले कमजोर बन्दैआएको छ ।

यति हुँदाहुँदै पनि सत्ता सन्तुलनमा राप्रपाको भूमिका निर्णायक रहँदै आयो । अझ २०७० को दोस्रो संविधानसभा निर्वाचनपछि गणतन्त्र अस्वीकार गरेको राप्रपा नेपाल त चौथो शक्तिका रुपमा उपस्थित भयो तर, अहिले उसको हालत पनि अत्यन्त नाजुक छ ।

२०४६ को जनआन्दोलनको सफलतापछि मुलुकमा बहुदलीय व्यवस्था स्थापना भएसंगै पंचायतका हस्ती मानिने पूर्वप्रधानमन्त्रीद्वय लोकेन्द्रबहादुर चन्द र स्व. सूर्यबहादुर थापाको नेतृत्वमा विसं २०४७ जेठ १५ गते एकै दिन गठन भएको दुई राप्रपा अहिले पनि विभाजनको शिकार छ ।

दुई राप्रपा एक भएको केही महिना अघि निर्वाचनको संघारमै पुनः विभाजित भयो । राजतन्त्र र धर्मनिरपेक्ष मुलुकको माग गर्ने राप्रपा नेपाल र गणतन्त्र स्वीकार गरेको राप्रपाबीचको एकीकरण टिक्न सकेन र अहिले यी दुबै पार्टीको हालत निर्वाचनले नाजुक बनाइदिएको छ ।

यसको एउटै कारण भनेको आन्तरिक विभाजन र संवैधानिक राजतन्त्र वा लोकतान्त्रिक गणतन्त्रबारेको नीति र व्यवहारमा एकरुपता नहुँदा पुरानो शक्ति मानिने राष्ट्रिय प्रजातन्त्र पार्टीले निर्वाचनमा पराजय भोगेको छ ।

यही मंसिर १० र २१ गते भएको प्रतिनिधिसभा र प्रदेशसभा निर्वाचनको परिणामले सो पार्टीले अवलम्बन गर्दै आएको राजनीतिक सिद्धान्तलाई कार्यान्वयन नगरिएकाले जनताले अनुमोदन गरेको पाइएन ।

प्रत्यक्ष निर्वाचनतार्फ राप्रपाले एकस्थान जिते पनि अहिलेसम्म सो दल राष्ट्रिय पार्टी बन्नसक्ने संकेत देखिएको छैन । ५० प्रतिशतको हाराहारीमा समानुपातिक मतगणना भैसक्दा राप्रपाले ३ प्रतिशत मत पाउन सकेको छैन ।

निर्वाचनमा प्रतिनिधिसभाको प्रत्यक्षतर्फ राप्रपाले नेपाली काँग्रेससँग तालमेल गरी कुल पाँच स्थानमा उम्मेदवारी दिएकामा एक स्थानमा मात्र जित हासिल गरेको छ ।

विजयी एक स्थानमा पनि वाम गठबन्धनसँगको तालमेलका कारण सो पार्टीलाई सफलता मिलेको हो । पार्टीका अध्यक्ष कमल थापाले मकवानपुर–१ बाट नेकपा एमालेका कृष्णप्रसाद दाहालसँग छ हजार ७२ मतान्तरले पराजय भोग्नु परेको छ । दाहाललाई ४० हजार ६३० मत प्राप्त हुँदा थापाको ३४ हजार ५५८ मत आएको थियो ।

राप्रपाका महामन्त्री राजेन्द्र लिङ्देनले वाम गठबन्धनको समर्थनका कारण झापा–३ मा काँग्रेसका पूर्वमहामन्त्री कृष्णप्रसाद सिटौलालाई १३ हजार ४५५ मतान्तरले पराजित गर्नुभयो ।

यही वर्ष राप्रपाबाट फुटेर बनेको राप्रपा प्रजातान्त्रिकका अध्यक्ष पशुपति शम्शेर जबरा सिन्धुपाल्चोक–२ मा आठ हजार ३२ मतको फरकमा एमालेका नेता शेरबहादुर तामाङसँग पराजित हुनुभयो ।

काँग्रेस नेतृत्वको लोकतान्त्रिक गठबन्धनमा सहभागी भएको उक्त पार्टीले प्रत्यक्षतर्फ देशभरबाट चार सिटका लागि तालमेल गरे पनि एक सिटसमेत जित्न सकेन ।

राप्रपा एकीकरण भएलगत्तै पुन विभाजित डा प्रकाशचन्द्र लोहनी नेतृत्वको एकीकृत राप्रपा राष्ट्रवादीले कुनै गठबन्धनसँग तालमेल नगरी निर्वाचनमा होमिएकोमा कुनै पनि सिट जितेन ।

मुलुकमा हिन्दूराष्ट्र, संवैधानिक राजसंस्था र एकात्मक शासन व्यवस्थाको पक्षमा वकालत गर्दै आएको थापा नेतृत्वको राप्रपाले फरक मतसहित संविधानमा संघीय लोकतान्त्रिक गणतन्त्रको संविधानमा हस्ताक्षर गरी त्यसपछिका सरकारमा सहभागी हुँदै आएको थियो । तर सो पार्टीले निर्वाचनको घोषणापत्रमा पुन हिन्दूराष्ट्र र संवैधानिक राजसंस्थाको पक्षमा आफूलाई प्रस्तुत गरेको थियो ।

राणा नेतृत्वको राप्रपा प्रजातान्त्रिकले हिन्दूराष्ट्रको आवश्यकतामा जोड दिँदै परम्परागत शक्तिलाई समेत मान्ने विषयलाई चुनावी घोषणापत्रमा उल्लेख गरेको छ । डा लोहनी नेतृत्वको दल पाँच हजार वर्ष पुरानो वैदिक सभ्यतासहितको हिन्दूराष्ट्रको पक्षमा उभिएको छ । उसले राष्ट्रिय चरित्रसहितको संस्थाका रुपमा राजसंस्था र प्रत्यक्ष कार्यकारी प्रधानमन्त्री राख्नुपर्ने घोषणापत्रमा माग गरेको छ ।

तीन दशक लामो पञ्चायती व्यवस्थामा सक्रिय राजनीति गरेका नेतामध्ये तीनवटै पार्टीका अध्यक्ष अबका राजनीतिमा हावी हुने सम्भवना न्यून हुँदै गएको छ । राप्रपाका प्रवक्ता भुवन पाठक चुनावको मुखमा पार्टी विभाजन हुनु नै आफूहरुको परिणाम निराशाजनक हुनुको कारण भएको बताउनुहुन्छ । उहाँले निर्वाचन परिणामका बारे चाँडो केन्द्रीय समितिको बैठकमा समीक्षा गरिने जानकारी दिनुभयो ।

राप्रपा प्रजातान्त्रिकका महामन्त्री राजाराम श्रेष्ठले पार्टी विभाजनका अतिरिक्त लोकतान्त्रिक गठबन्धनका नाममा कम स्थानमा उम्मेदवार उठाइएकाले पनि पराजय भोग्न परेको विचार व्यक्त गर्नुभयो । उहाँ पार्टीका नीति तथा कार्यक्रम तल्लो तहसम्म पुर्याउन नसकेको समेत स्वीकार्नुहुन्छ ।

डा लोहनी नेतृत्वको दलका केन्द्रीय सदस्य सुन्दर पाण्डेले पार्टी विभाजन भएपछि संगठन निर्माणका लागि समय कम हुनुका साथै दुई पार्टीको चुनाव चिह्न गोलाकारभित्र र चारकुनाभित्र हलो दुईवटा भएका कारण पनि सफलता प्राप्त हुन नसकेको बताउनुभयो ।

 प्रदेश नं ७ मा राप्रपाको उपस्थिति शून्य

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

बाना

फेसबुक

बाना

ट्वीटर

सामाजिक सञ्जाल

More