स्वावलम्बनले दिलाएको सम्मान : पहिले घृणा गर्नेहरुले अहिले नमस्कार

22 February, 2018 17:50 | जन सरोकार | comments | 93450 Views

सम्मानको हकदार जात, लिंग र वर्ण अनि अनुहारको रंगलाई हैन, व्यक्तिको पुरुषार्थलाई गरिन्छ, उसको कर्मलाई गरिन्छ । जो पुरुषार्थी छ, उसले सबैबाट सम्मान पाउँछ ।

adsads
यस्तो दृष्टान्त पाल्पाका जय नेपालीमा लागू भएको छ ।

पाल्पाको रामपुर नगरपालिका–५ का जय नेपालीको जीवनको यथार्थ र वास्तविक भोगाइ थियो- पहिले पुराना च्यातिएका, फाटेका जुत्ता चप्पल हातमा लिएर सियो र धागोले सिलाएको देख्दा धेरैले थु थु र घृणा गर्ने गर्थे । समयले उनलाई व्यवसायी बनायो अनि राम्रै कमाउन थालेपछि उनीहरु आफैँ दुई हात जोडी नमस्कार गर्न थालेका छन् ।

आजभन्दा झण्डै दुई दशकअगाडि २०/२२ वर्षे ठिटो नेपालीले विदेशतिर जानुभन्दा गाउँघरमै केही गरौँ भन्ने मनसायले बेझाड बजारको एक छेउमा बसेर सियो र धागोको सहाराले पुराना च्यातिएका फाटेका जुत्ता चप्पल सिलाउन शुरु गर्नुभयो ।

त्यतिबेला उहाँसँग धागो र एउटा सियो मात्र जुत्ता चप्पल सिलाउने साधन थियो । “एउटा हातमा सियो र धागो, अर्को हातले काखमा राखिएको जुत्ता चप्पल समाउँदै मैले सिलाउन थालेको देखेपछि सबैका लागि म त्यतिबेला हास्यपात्र बनेँ, व्यवसायलाई मेहनतका साथ अगाडि बढाउँदै जाँदा हेयका दृष्टिले हेर्नेहरु अहिले प्रशंसा गर्दै दुई हात जोडेर नमस्कार गर्न थालेका छन्,” उहाँले भन्नुभयो ।

बजारको एक कुनाबाट शुरु गरेको सियो र धागोको काम अहिले सटरमा चलाउन पाउँदा निकै गौरव लागेको उहाँको भनाइ छ । “गल्लीमा बसेर अर्काका पुराना जुत्ता चप्पल सिलाएर बस्दा सबैले आलोचना गर्न थाले, मैले लाज नमानीकन इमान्दार भएर आफ्नो काम गर्दै गएँ, त्यसैको प्रतिफल अहिले मिलेको छ”, नेपालीले भावुक हँुदै भन्नुभयो ।

उहाँले जुत्ता चप्पल सिलाएर एक महिनामा रु ६० हजार बराबरको कमाई गर्न सफल हुनुभएको छ । चाडपर्वका बेला दिनमै दश हजार रुपैयाँ सम्मको कमाई हुने उहाँ बताउनुहुन्छ । “अर्काको जुत्ता चप्पल सिलाएर दुई दशक बिताएँ, काममा दुःख पनि छैन, बसी बसी विदेश जाने र सरकारी जागिरमा आबद्ध हुनेले भन्दा दोब्बर कमाई गरेको छु,” उहाँले भन्नुभयो ।

ग्राहकको भीडले नेपालीलाई काममा अहिले भ्याइनभ्याई छ । पुराना कामसँगसँगै अहिले आफँैले नयाँ जुत्ता चप्पल पनि तयार पार्न थाल्नुभएको छ । नयाँ कामबाट भन्दा पुराना कामबाट धेरै फाइदा लिन सकिने उहाँको भनाइ छ ।

मेहनत र परिश्रम गर्नेका लागि कुनै पनि काम ठूलो र सानो हुदैन । मेहनत गरियो भने अरबको खाडीमा कमाएको धनको दोब्बर कमाई स्वदेशमै गर्न सकिन्छ भन्ने सबैका लागि उदाहरणीय पात्र बन्नुभएको छ, जय नेपाली । “काम सानो या ठूलो होस्, इमान्दार भएर गरियो भने पैसा कमाउनका लागि समस्या छैन,” उहाँ भन्नुहुन्छ ।

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

फेसबुक

ट्वीटर

सामाजिक सञ्जाल

More