शिक्षामन्त्री गिरिराजमणि पोखरेलले डडेल्धुरामा एक सातादेखि अनशन बस्नुभएका डा. गोविन्द केसीलाई मुख्य मागहरु सम्बोधन भइरहेको बताउँदै अनशन तोडन आग्रह गर्नुभएको छ ।

मन्त्री पोखरेलले मुलुक अहिले कालापानीको बहसमा रहेको र सिंगो देश कालापानीको विषयमा एकतावद्ध ढंगले अगाडि बढिरहेको बेलामा डा साबले अनशनको बाटो लिने होइन भन्दै अनशन तोड्न आग्रह गर्नुभएको हो ।

सोमबार शिक्षा मन्त्रालयमा आयोजित पत्रकार सम्मेलनमा मन्त्री पोखरेलले डा. केसीले अहिले चिकित्सा शिक्षा ऐन कार्यान्वयनमा सहयोग गर्नुपर्ने बताउँदै डा केसीले उठाएका मुख्य मागहरु सम्बोधन भइरहेको समेत जानकारी दिनुभयो ।

अनशनरत डा. केसीको स्वास्थ्य जटिल बन्दै गए पनि सरकारले माग सम्बोधनमा पहल नगरेको भन्दै डाक्टर केसीका समर्थकले प्रदर्शन गरेका छन् ।