उद्यान तोडफोडको विषयमा सत्तापक्ष र विपक्षी सांसदबीच भनाभन

3 August, 2020 00:51 | प्रदेश , लुम्बिनी | comments | 45900 Views

प्रदेश नं ५ को प्रदेशसभामा सत्तापक्ष नेकपा र विपक्षी दल नेपाली काँग्रेसका सांसदबीच भनाभन भएको छ । रुपन्देहीको शुद्धोधन गाँउपालिका–५ स्थित दर्वाह पार्क (उद्यान) मा भएको तोडफोडको विषयले प्रदेशसभामा प्रवेश पाएपछि दुई पक्षबीच भनाभन भएको हो ।

प्रदेशसभाको विशेष समयमा बोल्दै विपक्षी दल नेपाली काँग्रेसकी प्रदेशसभाका सदस्य पुष्पा थरुनीले धर्म, संस्कृतिको संरक्षणका लागि जनताको अधिकार कुल्चन खाजेको जिकिर गर्दै पवित्र धार्मिकस्थल मानिएको अन्त्येष्टीस्थललाई शुद्धोधन गाँउपालिकाले जर्बजस्ती हटाउन खोजेको आरोप लगाउनुभयो ।

प्रदेशसभाका सदस्य तुलसी चौधरीले राजनीतिक व्यक्तिबाहेक शिक्षक कृष्णप्रसाद चौधरीसमेत तोडफोडमा संलग्न रहेकाले विभागीय कारबाहीको माग गर्दै सार्वजनिक सम्पत्तिको तोडफोड हुँदा पनि प्रहरी मुकदर्शक बनेको उल्लेख गर्नुभयो । उहाँले घटना हुन लागेको विषयमा रुपन्देहीका प्रमुख जिल्ला अधिकारीलाई जानकारी दिँदादिँदै पनि नियोजित रुपमा पार्कको तोडफोड भएकाले प्रजिअमाथि पनि प्रश्न उठाउन आवश्यक भएको बताउनुभयो ।

  

चौधरीले विकास निर्माणको काम देख्न नसकेकाले नेपाली काँग्रेसले बाँदरे प्रवृत्ति देखाएको आरोप लगाउँदै पालिकाको गुरुयोजनानुसार पार्क निर्माण भएको बताउनुभयो । सो पार्क प्रदेश सरकारको सहयोगमा निर्माण हुन लागेको थियो । पार्कको लागत रु एक करोड ३० लाख रहेको छ ।

प्रदेशसभाका सदस्य तुलाराम घर्तीमगरले सिद्धार्थ राजमार्गको झुम्सा क्षेत्र भासिएको अवस्थामा रहेको उल्लेख गर्दै राजमार्गका कारण बुटवलसँग गुल्मी, अर्घाखाँची र पाल्पाको सम्पर्क विच्छेद हुने सम्भावना देखिएको बताउनुभयो । उहाँले पाल्पाको तिनाउ गाउँपालिकामा रहेको खानी क्षेत्रमा जाने पहुँच मार्ग लापरबाही ढङ्गले निर्माण भएको बताउँदै सडकको व्यवस्थापनमा प्रदेश सरकारको ध्यानाकर्षण गराउनुभयो ।

प्रदेशसभाका सदस्य तिलकराम शर्माले विसं ०७१ सालदेखिका बाढीपीडितले राहत नपाएको उल्लेख गर्दै बाढी र डुबानको समस्यालाई सरकारले प्राथमिकता दिन आवश्यक भएको बताउनुभयो । प्रदेशसभाका सदस्य कृष्ण न्यौपानेले किसानका लागि रासायनिक मलको स्थायी समाधान खोज्न आग्रह गर्दै मलका कारण धानको उत्पादनमा ह्रास आउने सम्भावना भएको बताउनुभयो ।

सदस्य रुन्धावती शर्माले मलको अभाव हटाउन आग्रह गर्दै हिन्दूको पर्व रक्षाबन्धनमा सार्वजनिक बिदाको माग गर्नुभयो । सदस्य दिपेन्द्रकुमार अधिकारीले सुस्ता गाउँपालिका र प्रतापपुर गाउँपालिकामा वर्षाले केराखेती र उखुबाली नष्ट गरेको जानकारी दिँदै त्यस क्षेत्रमा एक हजार ५०० बिगाहामा लगाइएको धानबाली नष्ट भएको छ भन्नुभयो ।

सदस्य इन्द्र खरेलले मलको अभाव अन्त्य हुन्छ वा हुँदैन सरकारको स्पष्ट जवाफ आउनुपर्ने बताउनुभयो । प्रदेशसभामा सदस्यहरु युवराज खनाल, रमा अर्याल, सन्तोष पाण्डेलगायतले प्रदेश सरकारलाई विभिन्न सुझाव दिनुभएको थियो ।

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

फेसबुक

ट्वीटर

सामाजिक सञ्जाल

More