एनआरएनए जापानको नवौँ अधिवेशन निर्वाचन समिति पुन:गठन

गैरआवसीय नेपाली संघ एनआरएनए जापानको नवौँ अधिवेशन निर्वाचन समिति पुन:गठन गरिएको छ । नवगठित निर्वाचन समिति संयोजकमा एनआरएनए जापानका संस्थापक अध्यक्ष संयोजकमा राजन प्रधानाङ्ग चयन हुनु भएको छ ।

एनआरएनए जापान राष्ट्रिय समन्वय परिषदको नवौं अधिवेशनका लागि यस अघि पूर्वअध्यक्ष तथा आईसीसी सदस्य ओम गुरुङ संयोजक रहेको समिति भंग गरी नयाँ समिति तयार गरिएको हो ।

पूर्वघोषित तीन सदस्यीय निर्वाचन समितिको सुझावका अनुसार आईसीसी सदस्यहरू र एनआरएनए जापान कार्यसमिति पदाधिकारीहरूको संयुक्त बैठकले निर्वाचन समितिको सुझावलाई अनुमोदन गर्दै निर्वाचन समितिलाई पुनर्गठन गरी समितिलाई पुर्णता दिएको संस्थाका महासचिव बुद्धिराज घिमिरेले जानकारी दिनुभयो ।

नवगठित निर्वाचन समितिमा संस्थापक अध्यक्ष प्रधानाङ्ग संयोजक रहने गरि एनआरएनए जापानका पूर्व अध्यक्षहरु ओम गुरुङ, रोशन केसी, पारसमणी पोखरेल, सुदन थापा सहित सामाजिक ब्यक्तित्वहरू शालीकराम भण्डारी, बिजय थकाली, सरद गौचन र बेलुकाजी थापा सहित १० जनाको समिति गठन गरेको छ।

निर्वाचनलाई प्रभावकारी र निष्पक्ष गराउनको लागि सल्लाहकारमा आईसीसी अध्यक्ष भवन भट्ट र एसिया प्यासिफिक संयोजक किरणबिक्रम थापा सहित कानुनी सल्लाहकारमा डा बलराम श्रेष्ठ र प्राविधिक सल्लाहकारमा डा वेद काफ्लेलाई चयन गरेको हो । निर्वाचन समितिले आफ़्नो कार्यभारको ज़िम्मेवार बहन गर्दै छिट्टैनै निर्वाचन तालिका, विधि र प्रक्रिया सार्वजानिक गर्दै ईभोटिंङ (अनलाईन भोटिंङ) गर्ने तयारी गरी रहेको कुरा समिति सदस्य सचिब बेलुकाजी थापाले जानकारी दिनुभएको छ ।

साथै निर्वाचन समितिलाई परिषदको बिधान २००४ को संशोधित सहितको विधान २०१९ अनुसार कार्यसम्पादन गर्न गराउन एनसीसी जापानले अनुरोध समेत गरेको छ । अधिवेसन सेप्टेम्वर ६ तारिक हुने र निर्वाचन ८ तारिक हुने बताईएको छ ।