प्रधानमन्त्री केपी शर्मा ओलीले भारतलाई नेपाली भूमि कालापानी, लिपुलेक, लिम्पियाधुराबाट आफ्ना सेना फिर्ता लैजान आग्रह गर्दै अतिक्रमित भूमि फिर्ता ल्याइछाड्ने दृढता व्यक्त गर्नुभएको छ ।

आइतबार काठमाडौंमा राष्ट्रिय युवा संघ नेपालको एकता भेलालाई सम्बोधन गर्दै प्रधानमन्त्री ओलीले भन्नुभयो ‘हाम्रो भूमिबाट छिमेकीले विदेशी सेना फिर्ता लैजाऊन् हामी हाम्रो भूमि फिर्ता ल्याउँछौं ।

उहाँले संवादकै मार्फतबाट सीमा विवाद समाधान गर्न सरकार सक्षम रहेको बताउँदै भन्नुभयो छिमेकीसँग अलिकति पनि तनाव नहोस् भन्ने हामी चाहन्छौं । अहिलेको सरकार संवाद गर्न नसक्ने छैन । राष्ट्रिय हितका पक्षमा अड्न र लड्न सक्छ ।

प्रधानमन्त्री ओलीले सीमा अतिक्रमणका बिरुद्धमा प्रधानमन्त्रीले केही नबोलेको आरोप प्रतिपक्षी दलले लगाइरहेका बेला सो धारणा राख्नुभएको हो । कार्यक्रममा उहाँले भन्नुभयो ‘हामी आफ्नो भुमी एक इन्च पनि मिच्न दिदैनौ । अरुको जमिन चाहिदैन । सीमा अहिले मिचिएको होइन । तर यो विषयमा अहिले राष्ट्रिय एकता कायम गर्न हामी सफल भएका छौं ।’

प्रधानमन्त्री ओलीले नेपालको कुरा अहिले अन्तर्राष्ट्रिय मञ्चहरुमा सुनिन थालेको भन्दै राष्ट्रियताको पक्षमा सरकार दृढ उभिएकै कारण नेपालको गरिमा बढेको र केही वर्ष अघिसम्म राष्ट्रियताको पक्षमा सरकार हुनु भनेको मृगतृष्णा हुन्थ्यो भन्दै अहिले नेपाल त्यो अवस्थामा नरहेको दावी गर्नुभयो ।