विश्वमा सबैभन्दा बढी रुचाइएका स्टाइलिस फुटबल खेलाडी डेभिड बेकह्याम कारबाहीमा परेका छन् । उनले गाडी चलाउँदा मोबाइल फोनको प्रयोग गरेपछि छ महिनासम्म सवारी चलाउन प्रतिबन्ध लगाइएको छ ।

ब्रिटेनमा सवारी चलाउँदा फोन समात्ने कामलाई गैरकानुनी मानिन्छ । यद्यपि नसमातीकन ह्यान्डसफ्री उपकरणमार्फत् बोल्न भने पाइन्छ । नियम उल्लङ्घन गरे लाइसेन्समा छ अङ्कको कारबाही गरिन्छ र २०० पौन्ड जरिवाना तिर्नुपर्छ । तर घटनाको प्रकृति हेर्दै दोषीलाई अदालतमा झिकाएर थप जरिवाना तिराउन सकिन्छ ।

इङ्ग्ल्यान्डका राष्ट्रिय फुटबल टोलीका भूतपूर्व क्याप्टेन बेकह्यामले सन् २०१८ को नोभेम्बर २१ मा सेन्ट्रल लन्डनमा आफ्नो बेन्ट्ली कार चलाउँदै गर्दा फोन प्रयोग गरेका थिए ।

अदालतका अनुसार गाडी चलाउँदा उनले फोन उठाएको तस्बिर एक व्यक्तिले खिचेका थिए । यसअघि पनि तीव्र गतिमा गाडी चलाएकाले बेक्ह्यामलाई कारबाही गरिएको थियो ।

गाडी चलाउँदा फोन चलाएको प्रमाणित भएकाले ४४ वर्षीय बेकह्यामले त्यसबापत ७५० पौन्ड स्टर्लिङ जरिवाना पनि तिर्नुपर्नेछ । त्यस्तै अभियोजन प्रक्रियामा भएको खर्चका लागि १०० पाउन्ड र अतिरिक्त ७५ पौन्ड तिर्नुपर्नेछ ।

अदालतका अनुसार बेक्ह्यामले घुँडाको तहमा हातमा राखिएको फोन चलाएको देखिएको थियो । अभियोजनकर्ता म्याथ्यू स्प्र्याटका अनुसार सीधा अगाडि हेरेर सडकमा ध्यान दिनुको साटो उनले तलतिर ध्यान दिए ।

बिबिसिका अनुसार बेक्ह्यामको पक्षमा वकालत गरेका जेर्राड टिरेलका अनुसार सोधिएका प्रश्नमा बेक्ह्यामले उक्त दिन वा घटनालप सम्बन्धमा आफूलाई कुनै सम्झना नभएको बताएका थिए ।

टिरेलले अदालतमा बेक्ह्यामले गाडी चलाउनुलाई फुर्सदको आनन्ददायी काम मानेको बताएका थिए । उनी भ्याएसम्म आफ्ना सन्तानलाई विद्यालयसम्म पुर्‍याउन र ल्याउन जान्छन् । उनीहरू त्यस अवसरबाट वञ्चित भए पनि सजाय स्वीकारेका छन् ।

डेभिड बेकहृयाम फुटबल खेल्न सल्लाघारीबाट टेम्पो चढेर टौमदी पुग्ने