छिमेकीमा सीमा अतिक्रमण गर्ने नीति र चिन्तन- स्थायी सुरक्षा संयन्त्र आवश्यक

13 August, 2020 12:42 | राजनीति | comments | 26850 Views

गृहमन्त्री रामबहादुर थापाले छिमेकीको सीमा अतिक्रमण गर्ने नीति र चिन्तन रहेको बताउँदै अहिले पनि सीमा स्तम्भ फाल्ने वा सार्नेलगायत काम भइरहेको बताउनुभएको छ । उहाँले सीमाका बारेमा स्थायी रूपमा संयन्त्र बनाएर त्यसले समयसमयमा त्यसको पुनरावलोकन गर्नुपर्ने प्रस्ताव समेत गर्नुभएको छ ।

नेपाल–भारतबीच दशगजा क्षेत्रमा सीमाको विवाद नभए पनि भोगचलन सम्बन्धी समस्या रहेको बताउँदै धेरै समस्या छलफलमार्फत नै टुङ्ग्याउन सकिने जानकारी दिनुभयो । उहाँले सीमा सुरक्षासम्बन्धी विशेष व्यवस्था गर्न आवश्यक रहेको पनि बताउनुभएको छ ।

  

प्रतिनिधिसभा, राज्य व्यवस्था समितिको बैठकमा उहाँले विवाद दुई पक्षीय समझदारी र कूटनीतिक पहलबाट समाधान गर्न सकिने बताउँदै परराष्ट्र मन्त्रालयले दुई पक्षीय छलफलमार्फत समस्या समाधान गर्न सक्ने बताउनुभयो । उहाँले भन्नुभयो, सीमा छुट्याउने आधार नदीलाई मानिँदै आएको र नदीले समयसमयमा आफ्नो धार बदल्ने हुँदा समस्या आउने गरेको छ ।संसदीय समितिले पनि स्थलगत निरीक्षणलगायत काममार्फत समस्या हल गर्न लाग्नुपर्ने उहाँले बताउनुभयो । उहाँले भन्नुभयो, “हामी सबैले चौतर्फी रूपमा पहल गर्दा मात्रै समस्या समाधान हुनसक्छ ।”

भूमि, सहकारी तथा गरिबी निवारणमन्त्री पद्मा अर्यालले सरकारले सीमा निरीक्षण र अनुमगमनको काम नियमित रूपमा गरिरहेको बताउनुभयो । सीमामा रहेका पिलरमध्ये कति राम्रो अवस्थामा छन् कति भत्किए र कति हराए भन्ने समेत अध्ययन भइरहेको उहाँको भनाइ छ ।

परराष्ट्र सचिव शङ्करदास बैरागीले मङ्सिरमा गठन भएको सीमा निरीक्षण समितिले प्रतिवेदन तयार गरेको बताउनुभयो । सीमामा रहेका समस्यामा विषयमा आगामी दिनमा सानो समूहमा छलफल गरेर अघि बढिने उहाँको भनाइ छ ।

समितिले सरकारले कोभिड–१९ नियन्त्रणका लागि सीमाका १० नाका मात्रै खुलाउने निर्णयको स्वागत गरेको छ । कोभिडले समस्या मात्रै नभएर अवसर पनि खुलाएको समिति सभापति शशि श्रेष्ठले बताउनुभयो । सरकारले कोभिडपछिको समयमा पनि सीमालाई थप व्यवस्थित गर्न सक्ने उहाँको भनाइ छ । उहाँले प्रशासनले कुनै एउटा जिल्ला प्रवेश गर्दा व्यक्तिको विवरण लिनुपर्ने बताउनुभयो । उहाँले भन्नुभयो, “एम्बुलेन्सबाट बिरामीबाहेकका मान्छेको आवतजावत रोक्न जरुरी छ ।”

समितिका सदस्य लालबाबु यादव, पम्फा भुसाल, राजेन्द्र श्रेष्ठ, देवेन्द्रराज कँडेल, छक्कबहादुर लामा, प्रेम सुवाल, नरबहादुर धामी, यशोदा सुवेदी, लक्ष्मी चौधरी लगायतले सीमाबाट नेपाल प्रवेश गर्ने सबैको नाम, ठेगाना र सम्पर्क नम्बर टिप्नुपर्ने बताउनुभएको थियो । सीमाको विषयलाई अन्तर्राष्ट्रियकरण गर्नुपर्ने उहाँहरूले औँल्याउनुभयो ।

समितिमा कञ्चनपुरका स्थानीयवासी सम्मिलित अन्तर्राष्ट्रिय सीमा समितिले सरकारलाई त्यहाँको सीमामा रहेका समस्या र त्यसको समाधानका उपायका बारेमा बताएको थियो ।

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

फेसबुक

ट्वीटर

सामाजिक सञ्जाल

More