दुईतिहाइ बढी सदस्यको मत हेटौंडा राजधानी अनुपयुक्त- सत्तापक्षको ह्वीप गलपासो

5 January, 2020 17:05 | प्रदेश , बागमती प्रदेश | comments | 33600 Views

संघीय सरकार र अधिकांश प्रदेश सरकार संचालन गरिरहेको सत्तारुढ नेपाल कम्युनिष्ट पार्टी (नेकपा)ले प्रदेश नं. ३ को नाम वाग्मती र राजधानी हेटौंडा प्रस्ताव गर्ने निर्णय गर्दै सो प्रदेशका आफ्ना सदस्यहरुलाई सोही निर्णय अनुसार गर्न ह्वीप जारी गरेपछि अहिले प्रदेश सदस्यहरु अलमलमा परेका छन् ।

प्रदेश नं ३ को स्थायी राजधानीको विषय यतिखेर प्रदेशसभा सदस्यहरूलाई गलपासो बनेको छ ।

adsads

प्रदेश नं ३ को स्थायी राजधानी र नाम टुङ्याउन हेटौंडामा यतिखेर प्रदेशसभादेखि पार्टीसमेतमा मत विभाजित हुँदा प्रदेशसभा सदस्यलाई उक्त विषय गलपासो बनेको अधिकांश प्रदेशसभा सदस्यहरूले गुनासो गरेका छन् ।

प्रदेश नं ३ भित्रका १३ जिल्लामध्ये मकवानपुर र चितवन बाहेकका ११ वटा जिल्लाका दुईतिहाइभन्दा बढी सदस्यले हेटौंडा स्थायी राजधानी उपयुक्त छैन भन्ने धारणा बाहिर ल्याउँदा पनि नेकपाभित्र भने पार्टीको ह्वीप जारीले नेकपाका प्रदेशसभा सदस्यलाई थप समस्या भएको हो ।

प्रदेशसभा सदस्य शशीजङ्ग थापाले स्थायी राजधानी हेटौँडा अधिकांशका लागि अनुपयुक्त भएको बताउँदै भक्तपुर या काभ्रे नै स्थायी राजधानी उपयुक्त हुने बताउनुभयो । अधिकांश प्रदेशसभा सदस्यको चाहना काभ्रे नै स्थायी राजधानी उपयुक्त हुने धारणा रहेको बताउँदै उहाँले भन्नुभयो, “सबै दृष्टिकोणले भक्तपुर वा काभ्रे उपयुक्त हो, शहरी विकास मन्त्रालयको प्राविधिक टोलीले भक्तपुर उपयुक्त भनेर प्रतिवेदन बुझाएकै हो, हामीले चुनावमा प्रतिबद्धता जनाएकै हौँ तर अहिले पार्टीको परिस्थिति फरक हुँदा समस्या आएको छ ।”

अर्का सदस्य चेतनाथ सञ्जेलले हेटौँडा स्थायी राजधानी अनुपयुक्त भएको भन्दै पार्टी सचिवालयको निर्देशकसहित काभ्रे वा हेटौँडाकाबारेमा छलफल गरेर सहमति कायम गर्ने प्रयास भइरहेको जानकारी दिनुभयो ।

प्रदेशसभा सदस्य बसुन्धरा हुमागाइँले काभ्रेमा राजधानी नबनाउन नेकपाभित्र निकै चलखेल भएको बताउँदै काभ्रे विरुद्ध अदृश्य शक्तिसमेतको चलखेल बढेको बताउनुभयो । उहाँले संविधानले दिएको अधिकार प्रयोग गर्ने र पार्टीले ह्वीप जारी नगर्ने हो भने दुईतिहाइ बहुमतभन्दा बढी काभ्रेको पक्षमा मतदान हुने जिकिर गर्नुभयो । उहाँले भन्नुभयो, “हामी इतिहास रचेर जान्छौँ, काभ्रेको पक्षमा मतदान गर्छौँ, हाम्रा सन्ततीलाई हामीलाई धिक्कार्ने बाटो दिँदैनौं ।”

पार्टीको लिखित निर्देशन नआएकाले सुझावलाई मान्नै पर्छ भन्ने नभएको नेकपाका अधिकांश सदस्यहरूको भनाइ छ । अर्का प्रदेशसभा सदस्य रत्न ढकालको पनि उस्तै भनाइ छ । उहाँले भन्नुभयो, “काभ्रेलाई स्थायी राजधानी बनाउन प्रस्ताव दर्ता गर्छौं, बहुमत सांसदको चाहना हेटौँडाको विकल्प काभ्रे नै हो, तर अहिले पार्टीको निर्देशन र विभिन्न खालका प्रलोभन बाँडेर काभ्रेको पक्षमा दुईतिहाइ पुग्न नदिने षडयन्त्र भइरहेको छ ।” उहाँले यो विषयमा पार्टीले निर्णय गर्नु र निर्देशन दिनु निकै दुःखद् भएको बताउँदै संवैधानिक अधिकार खोस्ने प्रयास भएको गुनासो गर्नुभयो ।

अर्का सदस्य लक्ष्मण लम्सालले हेटौँडा मै पनि पार्टीको गुटको भेला हुनु दुःखद् भएको बताउँदै अन्तिम समयसम्म काभ्रे राजधानी बनाउन आफूहरु लड्ने र आफ्नो मत काभ्रेका लागि जाहेर गर्ने बताउनुभयो ।

अर्का सदस्य चन्द्र लामाले २१ गते काभ्रेलाई राजधानी बनाउने प्रस्ताव आफूले पेश गर्ने बताउँदै संविधान र पार्टीको विधान विपरीत निर्णय आउनु विडम्बना भएको बताउनुभयो । उहाँले भन्नुभयो, “पार्टीको जस्तोसुकै निर्देशन आओस, काभ्रे मै राजधानी बनाउन म प्रस्ताव दर्ता गराउँछु, निर्देशन मान्नुपर्छ भन्ने छैन, मतदानमा ‘फ्लोर क्रस’ हुन्छ, हुन्छ ।”

अहिले हटौँडाका प्रदेशसभा सदस्यको बस्ने खानेसमेत टुङ्गो नहुँदा र होटलमा बस्नु पर्दा तलबसमेत नबच्ने गरेको गुनासो बढेको । हेटौंडा जाने सडक जीर्ण भएको र ज्यान जोखिममा राखेर ओहोरदोहोर गर्नुपर्ने बाध्यतासमेत रहेको भन्दै अधिकांश सदस्यले प्रदेश राजधानी हेटौँडा अनुपयुक्त रहेको प्रतिक्रिया दिएका छन् ।

सरकारले तत्काल द्रुतमार्ग, कान्ति लोकपथ, भीमफेदी कुलेखानी सुरुङ मार्ग, फर्पिङ फाखेल सडक निर्माण सम्पन्न र फर्पिङ फाखेल, कुलेखानी हेटौंडा सडकको स्तरोन्नति गर्नुपर्ने सभा सदस्यहरूको भनाइ छ ।

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

फेसबुक

ट्वीटर

सामाजिक सञ्जाल

More