पूर्व सभामुख महरा डिल्लीबजार कारागारबाट रिहा, थुनामा रहेका भिआईपीद्वारा माला लगाएर विदा

17 February, 2020 19:53 | राजनीति | comments | 62250 Views

बलात्कार उद्योगको मुद्दाबाट सफाई पाउनुभएका पूर्व सभामुख कृष्णबहादुर महरा थुनामुक्त हुनुभएको छ । सोमबार जिल्ला अदालत काठमाडौंले सफाई दिएपछि उहाँलाई प्रहरीले डिल्लीबजार कारागार लगी प्रक्रिया पूरा गरेर रिहा गरेको हो ।

महरालाई डिल्लीबजार कारागारमा रहेका नेपाल प्रहरीका पूर्वमहानिरीक्षक रमेश चन्द ठकुरी, सशस्त्र प्रहरीका पूर्वडीआईजी रञ्जन कोइराला लगायतले माला लगाएर विदाइ गरेका थिए ।

  

संसद सचिवालयकी महिला कर्मचारी रोशनी शाहीलाई जवरजस्ती करणीको प्रयास गरेको अभियोगमा पुर्पक्षका लागि थुनामा रहनुभएका महरालाई सोमबार नै अदालतले सफाइ दिएको थियो ।

महरालाई सुरुमा बलात्कारको आरोप लगाउने शाहीले पछि बयान फेर्दै महरालाई बचाउने बयान दिएकी थिइन् । शाहीले उक्त दिन महरा आफ्नो कोठामा नआएको बयान दिएपछि अदालतले मुख्य आधार यसैलाई बनाएर महरालाई सफाइ दिएको हो । महराले पनि उक्त दिन रोशनीको कोठा तीनकुने नगएको बयान दिनुभएको थियो ।

गत असोज १२ गते राति महरा रक्सी सेवन गरी कोठामा आएको र बलात्कार प्रयास गरेको रोशनीले त्यसबेला भिडियोमा भनेकी थिइन् । उक्त भिडिओमा आफूमाथि महराले बलात्कार प्रयास गरेको र नमान्दा कुटपिट गरेको शाहीले भनेकी थिइन् ।

सरकारी वकिल कार्यालयले अदालतमा बुझाएको अभियोगपत्रमा सबभन्दा बलियो प्रमाण घटनाकै रात शाहीको कोठामा पुगेर प्रहरीले लिएको भिडिओ रेकर्डलाई देखिन्थ्यो ।

‘प्रहरीलाई भनिदिन्छु’ भनेपछि महरा हतारहतार निस्किएको शाहीले भोलिपल्ट (गत असोज १३ गते) पत्रकार अजयबाबु सिवाकोटीसँगको भिडिओ अन्तर्वार्तामा पनि बताएकी थिइन् ।

त्यसरी हतारहतार महरा निस्किँदा कोठामै छुटेका जुत्ताको तलुवा, फुटेको चस्माको एउटा सिसा र चस्माको भाँचिएको खुट्टा प्रहरीले बरामद गरेको थियो। उक्त सिसाको पावर र महराले लगाएको चस्माको पावर एउटै भएको जाँचबाट देखिएको थियो। यो महरा विरूद्धको दोस्रो ठूलो प्रमाणका रूपमा हेरिएको थियो ।

नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

तपाईंको प्रतिकृया

Loading...

ताजा समाचार

फेसबुक

ट्वीटर

सामाजिक सञ्जाल

More