प्रदेश नं ३ को कर तथा गैरकरसहित दुई विधेयक पारित

27 June, 2019 00:32 |प्रदेश , प्रदेश ३ | comments | 22800 Views

    प्रदेश नं ३ प्रदेशसभाको बैठकले कर तथा गैरकर राजश्वसम्बन्धी विधेयक २०७५ लाई संशोधन गर्न बनेको विधेयक २०७६ र प्रदेशमा आर्थिक ऐन २०७५ लाई संशोधन गर्न बनेको (क), (ख) र (ग) विधेयकलाई बहुमतले पारित गरेको छ ।

    उक्त बैठकमा आर्थिक मामिला तथा योजनामन्त्री कैलाशप्रसाद ढुङ्गेलले ती दुवै विधेयकलाई पारित गर्न भनी प्रस्ताव राख्नुभएको थियो ।

    adsads

    बुधबार नै बसेको दोस्रो बैठकमा सरकारद्वारा प्रस्तुत गरिएको आगामी आव २०७६/७७ का लागि विनियोजित बजेटमाथि छलफल जारी रह्यो ।

    उक्त विनियोजित बजेटको छलफलमा प्रदेशसभाका सदस्यले स्थायी राजधानी र नामकरण टुङ्गो नलागेसम्म हालको हेटौँडामा मन्त्रिपरिषद्को भवन आगामी आवभित्र निर्माण गर्ने बजेट छुट्याइएकामा चिन्ता व्यक्त गर्नुभयो ।

    उक्त बैठकको छलफलमा बहुसङ्ख्यक सदस्यले प्रदेशको नीति योजना आयोगले सन्तुलित र समानुपातिक ढङ्गबाट प्रदेशको १३ वटै जिल्लामा योजनालाई पारदर्शीरुपमा समेट्न नसकेको र सो आयोजनाद्वारा अद्यावधिक गरिएको ‘प्रोजेक्ट बैंक’लाई पारदर्शी ढङ्गबाट कार्यान्वयनमा ल्याउन सुझाव दिनुभयो ।

    बजेटको विनियोजित शीर्षकमा प्रदेशमा पूँजीगत खर्चभन्दा चालूतर्फको खर्चको आकार निकै बढाइएको भन्दै उहाँहरुले पहुँचमा नरहेका जनताका लागि पिउने पानी र स्वास्थ्य उपचारका लागि उच्च प्राथमिकता दिएर बजेट छुट्याइनुपर्ने माग गर्नुभयो ।

    प्रदेशका जिल्लालाई पहिलो प्राथमिकतामा कृषि उत्पादन साथै पर्यटन क्षेत्रको विकासलाई गुरु योजनाका रुपमा बजेटमा समावेश गर्न आग्रह गर्दै जिम्मेवार मन्त्रीले दलगत स्वार्थ र आफ्नो पार्टीलाई मात्र प्राथमिकता दिने प्रवृत्तिलाई त्याग गर्नुपर्ने सुझाव दिनुभयो ।

    प्रदेशसभाको सदस्यले निर्वाचन क्षेत्रमा पूर्वाधार विकासका लागि भनि प्रत्येक सदस्यलाई दिइने रु तीन करोड अनुदानको लोभमा सदस्य फस्न नहुने र आफ्नो कार्यकर्तालाई रिजाउनका निम्ति मात्रै सो रकम दुरुपयोग हुनसक्ने सम्भावना तीब्र बढेकाले भ्रष्टाचार नियन्त्रण हुन नसक्ने धारणा व्यक्त गर्दै सो रकम सरकारले फिर्ता गर्नुपर्ने माग गर्नुभयो ।

    उक्त बैठकमा सहभागी हुने सदस्यमा दीपक निरौला, नरोत्तम वैध, चन्द्रबहादुर लामा, सिर्जना सैँजु, लक्ष्मण लम्साल, रीमा लामा, रत्नप्रसाद ढकाल, शान्ति थिङ, रीना गुरुङ, विजय केसी श्रेष्ठ, प्रेमबहादुर तामाङ, केशवराज पाण्डे, सोभा शाक्य, प्रतिमा श्रेष्ठ, जीवन डङ्गोल, केशव पोखरेल, पुकार महर्जन, विशाल खड्का, सन्तबहादुर प्रजा, रामकाजी महर्जन र रामेश्वर फुँयाल हुनुहुन्थ्यो । प्रदेशसभाको अर्को बैठक असार १२ गते दिनको ११ बजे बस्नेछ ।

    नेपालजापान सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

    तपाईंको प्रतिकृया

    Loading...

    ताजा समाचार

    फेसबुक

    ट्वीटर

    सामाजिक सञ्जाल

    More
    error: Content is protected !!