प्रधानमन्त्री केपी ओलीले आफू प्रधानमन्त्री बनेपछि देशको विकास र समृद्धिको सपना देखाएको बताउँदै केही हुँदैन, केही भएन भनेर आशा र सपनाहरु मुर्छा परेका बेला त्यसलाई जगाउन आफूले पानी छरेकै हो भन्नुभएको छ ।

शुक्रबार सैनिक टुडिखेलमा संविधान दिवसको अवसरमा आयोजित कार्यक्रमलाई सम्बोधन गर्दै प्रधानमन्त्री ओलीले सो धारणा राख्दै आफ्नो काम मुर्छित सपना जगाउनु नै थियो जगाएँ, अब मुलुकमा विकासका लागि जग बनेको र विकासले तीव्रता पाउने दावी समेत गर्नुभएको छ । उहाँले अघिल्लो बर्षलाई सरकारले आधार बर्षका रुपमा घोषणा गरेको र त्यो आधार तयार भएकाले अब तला थप्दैथप्दै अघि बढ्ने प्रष्ट पार्नुभएको छ ।

आफ्ना सपनाहरुमाथि व्यंग्य गर्ने र आलोचना गर्नेहरुप्रति लक्षित गर्दै प्रधानमन्त्री ओलीले भन्नुभयो- “भन्नकै लागि त भन्न सकिन्छ खै त रेल, खै त पानी जहाज ? कता छ सतह जलमार्गमा मालवाहक सवारी कुदेको ? हामीलाई सपना किन देखाएको ? हामीमा आशा किन जगाएको ? म बिनम्रताका साथ स्वीकार्छु । मैले मुर्छित सपनामाथि पानी छम्केकै हुँ । मैले भनेको हुँ निदाएको बेलामा देख्ने सपना हैन, ब्युँझिएको बेलाको सपना देखौं । जब भविष्यप्रति आशावादी हुन्छ, सुन्दर भविष्यको सपना देख्छ, तब मात्र देश बाँच्छ । मेरो काम मुर्छित सपनाहरुलाई जगाउनु र तिनीहरुप्रति विश्वास बढाउनु थियो । ती विश्वास साकार पार्न हरेकले प्रयास गरुन् ।”

संविधानका जुन धाराले जतिबेला अप्ठ्यारो पार्छ त्यतिबेलै संशोधन : प्रधानमन्त्री

प्रधानमन्त्री ओलीले नेपालीहरुको सम्मृद्धिको सपना साझा सपना भएको भन्दै त्यो पुरा भएरै छाड्ने पनि दावी गर्दै मुलुकले काँचुली फेर्छ । हाम्रा सपना पुरा हुन्छन् । धैर्य गरौं । मुलुक बन्ने ठोस आधार तयार भएका छन् भन्नुभयो । मुलुक समृद्धिको आधार देखाउँदै प्रधानमन्त्री ओलीले भन्नुभयो प्रयोग नगरिएका प्रकृतिक स्रोत, दृष्टिकोणसहितको सरकार र जनसंख्याकि आधार समेत भएकाले अव मुलुक बन्न समय लाग्दैन ।

समारोहमा प्रधानमन्त्री ओलीले फुर्सदिलो युवापंक्तिमा थोरै चिन्ता भएको बताउँदै जसको ऊर्जा रचनात्मक काममा भन्दा सामाजिक सञ्जालमा खर्च गरिरहेको बताउँदै युवाहरुलाई देश बनाउने अवसरमा सहभागी बन्न म आग्रह समेत गर्नुभयो । सरकारप्रतिको सामाजिक संजालबाट भैरहेको आलोचनाप्रति टिप्पणी गर्दै उहाँले भन्नुभयो आजको आवश्यक्ता उछृङखलता र अराजकता गर्ने हैन, असन्तुष्टिको खेतीलाई उकेरा लाउने नभई नतिजामुखि बनाउन सबैको सहकार्य आवश्यक रहेको छ ।

असोज ३ गते सबैभन्दा ठूलो चाडको दिन भएको भन्दै उहाँले संविधान संशोधन गरेर अघि बढ्न सकिने पनि बताउनुभयो । उहाँले संविधानप्रति असन्तुष्टि राख्ने र संविधानभन्दा बाहिर रहेकाहरुलाई राजनीतिक मुलधारमा आउन ढिला नगर्न आग्रह गर्नुभयो र भन्नुभयो ‘राजनीतिक आन्दोलनको चरण पुरा भएको छ । अब पनि राजनीतिको नाममा शान्तिसुरक्षा र एकता खल्बल्याउने काम भए सरकारले त्यसलाई रोक्छ । लोकतान्त्रिक प्रणाली सुदृढ भएमात्रै जनता सुखी हुन्छन् ।’

सकियो ग्यास र पेट्रोलियम उत्पादनको सपना अब चुलाचुलामा बिजुलीको तार