संयुक्त अरब इमिरेट्स (युएई)मा कार्यरत केही नेपालीहरुले लकडाउनका कारण काम नपाएर अलपत्र परेको भन्दै तत्काल स्वदेश फर्काउने मागसहित नेपाली दूताबासमा धर्ना दिएका छन् । दुबईको इमिरेट्स क्याब ट्याक्सीमा काम गर्ने नेपाली नागरिकले मंगलबार नेपाल फर्काउन माग गर्दै धनाए दिएका हुन् ।

धर्नामा सो कम्पनीको बेवास्ताले अलपत्र परेका ३० नेपालीमध्ये १७ जना श्रमिक पुगेका थिए । यसअघि उनीहरूलाई यूएईकै प्रवासी नेपालीहरूले कोठा खोजेर राखेका थिए । तर, कोठा भाडाको समय अवधि सकिएपछि फेरि अलपत्र हुने अवस्था आएको भन्दै उनीहरु दूतावास पुगेका हुन् । उनीहरु लगेज बाकेरै दूतावासमा पुगेका थिए ।

मासिक १५ सय दिराम कमाइ हुन्छ भनेर आठ महिनाअघि युएई गएका उनीहरूलाई कम्पनीले महिना मरेपछि १ सय ८ दिराम दिन थाल्यो । ६ महिनामा पनि तलबको समस्या समाधान नभएपछि उनीहरू एक महिना अघिबाट नेपाल फर्किने प्रक्रियामा लागेका थिए । १० जना त फर्किए पनि । तर त्यति नै बेला नेपालले अन्तर्राष्ट्रिय उडानमा प्रतिबन्ध लगाएपछि अरू उतै रोकिए ।

उनीहरु धर्नामा बसेपछि दूतावासमा वार्ता भएको थियो । दूतावासले उनीहरुलाई पुनः एनआरएनएको सहयोगमा सारजाहमा बस्ने व्यवस्था मिलाएको बताएको छ । उनीहरुलाई सारजाहसम्म लैजाने प्रवन्ध पनि मिलाइएको दूतावासले एक विज्ञप्तिमार्फत जानकारी दिएको छ ।

ती कामदारहरु आठ महिना अघि मात्रै त्यहाँ पुगेका थिए । उनीहरुलाई लकडाउन खुलेलगत्तै नेपाल फर्किने प्रवन्ध गर्ने प्रतिवद्धता दूतावासले गरेको छ ।