चितवनमा अहिले दुई खालको प्रदर्शन भैरहेको छ । एउटा प्रदर्शन प्रहरी हिरासतमा रहेका पत्रकार रवी लामिछानेमाथि षड्यन्त्र भएको भन्दै उनको रिहाईको माग गर्दै भएको प्रदर्शन र अर्को मृतक शालिकराम पुडासैनीले न्याय पाउनुपर्छ भन्नेहरुको प्रदर्शन ।

प्रहरीले लामिछाने, पत्रकार युवराज कँडेल र नर्स अस्मिता कार्कीलाई पक्रेको छ । उनीहरुमाथि पुडासैनीको आत्महत्यामा दुरुत्साहन गरेको अभियोग छ ।

गत साउनमा चितवनको एक होटलमा मृत भेटिएका पत्रकार शालिकराम पुडासैनीको आत्महत्या प्रकरणमा अनुसन्धानन गर्न रवी लामिछानेसहित तीनजनालाई हिरासतमा लिइइएपछि रवीका समर्थकहरुले प्रहरीविरुद्ध प्रदर्शन गरेपछि चितवनका युवाहरुले अनुसन्धान प्रभावित नगर्न आग्रह गर्दै प्रदर्शन गरेका हुन् ।

‘स्वतन्त्र युवा समूह’ले शालिकरामको आत्महत्याको निष्पक्ष छानविन गर्न माग गर्दै शनिबार चौबिसकोठीमा प्रदर्शन गरे । उनीहरुले ‘निष्पक्ष छानविन गर्न देऊ’, ‘अपराधलाई राजनीतिकरण नगरौं’, ‘पुडासैनीले न्याय पाउनैपर्छ’ ‘दोषीलाई कारबाही होस्’, ‘एनजीओको हस्तक्षेप बन्द गर’ लगाएतका नारा लेखिएका प्लेकार्ड बोकेका थिए ।

यसअघि लामिछानेका समर्थकहरुले गरेको प्रदर्शनमा प्रहरीले हस्तक्षेप गर्दा दुवै पक्षबीच झडप भएको थियो । झडपमा पाँच जना प्रहरी घाइते छन् । स्थिति नियन्त्रणमा लिन प्रहरीले १० राउण्ड अश्रुग्याँस प्रहार गरेको थियो ।

रवी लामिछानेको पक्षमा चितवनमा उर्लियो मानव सागर (भिडियोसहित)