चेन्नई ६ विकेटले विजयी

इन्डियन प्रिमियर लिग(आइपिएल) अन्तर्गत दोस्रो क्वालिफायर खेलमा चेन्नई सुपर किंग्स विजयी भएको छ । शुक्रबार राति भएको खेलमा सन्दीप लामिछानेको टिम दिल्ली क्यापिटल्स चेन्नईसंग ६ विकेटले पराजित हुन पुग्यो ।

यो खेलमा पनि सन्दीप बेञ्चमै थिए । जितसंगै चेन्नई फाइनलमा प्रवेश गरेको छ । बिसाखापट्नममा भएको दोस्रो क्वालिफायरमा टस हारेर पहिले ब्याटिङ गरेको दिल्लीले निर्धारित २० ओभरमा ९ विकेट गुमाएर १४७ रन बनायो । उसका लागि ऋषभ पन्तले ३८ रन बनाए भने कोलिन मुन्रोले २७ रन जोडे । त्यस्तै शिखर धवन १८ रन बनाई आउट भए भने कप्तान श्रेयस आयरले १३ रन जोड्नु बाहेक अन्यले सम्झनलायक प्रदर्शन गरेनन् । चेन्नैको लागि दीपक चहर, हरबजन सिंह, रविन्द्र जडेजा र ड्वायन ब्राभोले २–२ विकेट लिए भने इमरान तहिर्को भागमा १ विकेट रह्यो ।

१४८ रनको मध्यम लक्ष्य लिएर मैदान उत्रेको चेन्नईले १९ ओभरमा ४ विकेट गुमाउदै लक्ष्य भेट्टायो । निकै राम्रो सुरुवात गरेको चेन्नईका दुई ओपनर ब्याट्सम्यान फाफ डु प्लेसिस र शेन वाट्सनले समान ५०-५० रनको अर्धशतकीय पारी खेले भने अम्बाती रायडु २० रनमा अविजित रहे । त्यस्तै सुरेश रैनाले ११ र कप्तान महेन्द्र सिंह धोनीले ९ रन जोडे । दिल्लीका लागि ट्रेन्ट बोल्ट, अक्सर पटेल, अमित मिश्रा र इशान्त शर्माले समान १-१ विकेट लिए । दिल्ली क्यापिटल्सको पहिलो पल्ट फाइनलमा पुग्ने लक्ष्यमा चेन्नाई बाधक बन्यो । योसँगै सन्दीपका लागि पनि आईपीएल यात्रा यो सिजनका लागि सकिएको छ । यस सिजन सन्दिपले ६ खेल खेलेर ७ विकेट लिए । खेलको म्यान अफ दी म्याच फाफ डु प्लेसिस भए ।

अब उपाधिको लागि आइतबार चेन्नईले मुम्बई इन्डियन्सको सामना गर्नेछ । मुम्बईले पहिलो क्वालिफायरमा चेन्नईलाई पराजित गर्दै उपाधि नजिक पुगेको थियो । पहिलो क्वालिफायरमा मुम्बईसँग हारेपछि चेन्नईले अर्को मौका पाउदै इलिमिनेटरको विजेता दिल्लीसँग दोस्रो क्वालिफायर खेल्नुपरेको हो । चेन्नई र मुम्बईले अहिलेसम्म समान ३-३ पटक आइपिएल उपद्जी जितेका छन् । मुम्बईले २०१३, २०१५ र २०१७ मा उपाधि जितेको थियो भने चेन्नईले सन् २०१०, २०११ र २०१८ मा उपाधि जितेको थियो ।

हाइलाइट्स-

सन्दीप नखेलेको खेलमा दिल्ली पराजित : मुम्बई ४० रनले विजयी