१३ औं दक्षिण एसियाली खेलकुद प्रतियोगिता (साग)मा नेपालले तेक्वान्दोमा छवटा स्वर्णपदक जितेको छ । योसंगै नेपालले अहिलेसम्म १४ वटा स्वर्ण जितेको छ ।

नेपालले तेक्वान्दोको १७ देखि २३ वर्ष उमेर समूहको टिम पोम्सेमा नेपालका निशा दर्नाल, स्वस्तिमा तामाङ र सञ्जिला तिमल्सिनाले स्वर्ण जितेका हुन् । तेक्वान्दोमा सोमबार नेपालले जितेको हो छैठौं स्वर्ण हो ।

त्यस्तै नेपालका लागि कराँतेबाट पनि आधा दर्जन स्वर्ण जितेको छ । सातदोबाटोमा जारी कराँते विधाका खेलहरुमध्ये कुमुते पुरुषतर्फ लक्ष्मण तामाङ्ले बङ्गलादेशका मोहम्मद मुस्तफालाई १–० को अन्तरले पराजित गर्नुभयो । तामाङ्को जितसँगै नेपालले कराँतेमा चौथो स्वर्ण हात पारेको हो । नेपालले एकल काता पुरुष, टिम काता महिला र पुरुष दुबैमा स्वर्ण पदक जितेको हो । एकल महिला कातामा भने नेपालले रजत पदक जितेको थियो ।

कराँते पुरुष तर्फ एकल कातामा मण्डेकाजी श्रेष्ठले साग उद्घाटनको भोलीपल्ट बिहानै स्वर्ण पदक जिताएर नेपाललाई सागमा पहिलो स्वर्ण दिलाउनुभयो । त्यसअघि चञ्चला दनुवारले कराँते एकल कातामा रजत पदक दिलाएर सागमा नेपाललाई पहिलो पदक दिलाउनुभएको थियो । लगत्तै कमल श्रेष्ठले तेक्वान्दो पुम्सेमा स्वर्ण पदक जितेर नेपाललाई दोस्रो स्वर्ण दिलाउनुभयो ।

काठमाडौंमा एकपछि अर्को स्वर्ण पदक आउने क्रम जारी रहँदा पोखरामा सम्पन्न ट्रायथलोनमा सोनी गुरुगङ्ले स्वर्ण पदक जित्नुभयो । यो नेपालको तेस्रो स्वर्ण पदक थियो ।

कराँते टिम काता पुरुष विधामा नेपालले जित हात पार्दै स्वर्ण पदकको संख्या पाँच पुग्यो । कराँते टिम काता महिलामा स्वर्ण पदक जितेर नेपालले छैठौं स्वर्ण हात पार्यो । तेक्वान्दो पुम्से २३–२९ वर्ष उमेर समूहमा पार्वती गुरुङ, लक्ष्मण तामाङ तथा आयशा शाक्यले स्वर्ण पदक जिते ।