एन आर एन न्युज

स्वास्थ्य विज्ञबीच अनुभव आदानप्रदानको वातावरण मिलाउन एनआरएनएको आग्रह

गैरआवासीय नेपाली संघ (एनआरएनए)ले स्वदेश र विदेशमा रहेका स्वास्थ्य विज्ञबीच ज्ञान सीप र अनुभव आदानप्रदानको वातावरण निर्माणका लागि नेपाल सरकारसँग आग्रह गरेको छ ।

सोमबार अध्यक्ष डा बद्री केसीको नेतृत्वमा संघका प्रतिनिधिमण्डलले स्वास्थ्य तथा जनसंख्या मन्त्री पदम गिरीलाई भेटेर उक्त आग्रह गरेको हो ।

भेटमा संघका अध्यक्ष डा केसीले नेपालबाट अरबौं रुपैया स्वास्थ्य सेवा तथा सामाग्रीका लागि बाहिरिने गरेकोले नेपालमै अत्याधुनिक स्वास्थ्य संयन्त्र, सेवा र प्रविधि स्थापित गरी विदेशबाट समेत नेपालमा उपचारका लागि आउनसक्ने वातावरण निर्माण गरेर नेपाललाई स्वास्थ्य हब बनाउन सरकारले पहल गर्नुपर्ने र त्यसमा संघले पनि सहकार्य गर्ने बताउनुभयो ।

अध्यक्ष डा केसीले संघका तर्फबाट भइरहेका स्वास्थ्य तथा परोपकारी गतिविधिबारे मन्त्री गिरीलाई जानकारी गराउनुभएको थियो ।

संघले विश्वभर फैलिएको कोरोना महामारीको कहरबीच कोरोना प्रभावित नेपालीको तथ्यांक संकलन एवं ५२ देशका तीन लाख भन्दा बढी नेपालीहरुलाई प्रत्यक्ष सहयोग गर्नुका साथै नेपालमा स्वास्थ्य सामाग्री र अक्सिजन सिलिन्डर, कन्सन्टेटर उपलब्ध गराइएको थियो ।

सो अवसरमा संघका संस्थापक अध्यक्ष डा उपेन्द्र महतोले स्वास्थ्य क्षेत्रमा रहेको ठूलो अभाव पूर्न गैरआवासीय नेपालीहरुले अवसर खोजिरहेको बताउनुभयो । स्वास्थ्य क्षेत्रमा लगानी गरी नेपाललाई स्वास्थ्य हब बनाउन सक्ने उहाँको भनाई थियो ।

मानव स्वास्थ्य जस्तो गम्भीर विषयमा सरकारले कुनै सम्झौता गर्न नहुने भन्दै डा महतोले सरकारले स्वास्थ्य क्षेत्रका विज्ञहरुसँग सहकार्य गरेर अघि बढे स्वास्थ्य क्षेत्रका असंगतिका थुप्रै क्षिद्रहरु पुर्न सकिने धारणा राख्नुभयो ।

भेटमा संघका प्रतिनिधिलाई सम्बोधन गर्दै स्वास्थ्य तथा जनसंख्या मन्त्री पदम गिरीले गैरआवासीय नेपालीहरुको ज्ञान, सीप, क्षमता र अनुभवलाई प्राथमिकताका साथ नेपालको स्वास्थ्य क्षेत्रमा प्रयोग गर्न सरकारले पहल गर्ने प्रतिबद्धता व्यक्त गर्नुभयो ।

उहाँले भन्नुभयो, “स्वास्थ्य क्षेत्रको बृहत विकासका लागि सरकार तपाईहरुसँग सहकार्य गर्न तयार छ, विशेषतः विकट क्षेत्रका विपन्न जनताका लागि गुणस्तरीय स्वास्थ्य सेवाको पहुँच विस्तारका लागि गैरआवासीय नेपालीको भूमिका अझ अहम हुन सक्छ यस विषयमा हामी निरन्तर छलफलमा रहनेछौँ र पक्कै हातेमालो गर्नेछौँ ।”

मन्त्री गिरीले स्वास्थ्य सेवा विस्तार र त्यसमा गैरआवासीय नेपालीको भूमिका सम्बन्धमा थप अध्ययन गरेर छिट्टै ठोस् निर्णय गरी सहकार्य अघि बढाउन आफू प्रतिबद्ध रहेको बताउनुभयो ।

भेटमा संघका पूर्व उपाध्याक्ष अर्जुन कुमार श्रेष्ठ, संघका सचिव गोविन्द गौतम, अन्तर्राष्ट्रिय समन्वय परिषद् सदस्य रामेश्वर गौतम (रसिया), राष्ट्रिय समन्वय परिषद् (एनसीसी)का पूर्व अध्यक्ष दिनानाथ राजभण्डारी लगायतको उपस्थिति रहेको थियो ।

प्रतिक्रिया राख्नुहोस्

सम्बन्धित खबर

Back to top button

Adblock Detected

Please turn off the Ad Blocker go get the website work properly.