पुष्पकमल दाहाल प्रचण्ड नेतृत्वको सरकारलाई विश्वासको मत दिएर सरकारपक्ष बनेको भए पनि आफूलाई प्रमुख प्रतिपक्षी दल भन्दै आएको नेपाली कांग्रेलाई संघीय संसद सचिवालयले प्रमुख विपक्षी दलको सुविधा दिएको छ ।
सोमबार सचिवालयका उपसचिव रामहरि थापाले सिंहदरबारस्थित कांग्रेस संसदीय दलको कार्यालयलाई पत्र लेखेर सो कुरा जानकारी गराइएको छ ।
पत्रमा भनिएको छ, “प्रतिनिधिसभामा विपक्षी दलको नेता माननीय शेरबहादुर देउवाज्यूले प्रमुख विपक्षी दलको नेताको हैसियतले प्राप्त गर्ने सुविधा माग भई आएको सन्दर्भमा सो सुविधा संघीय संसदका पदाधिकारी तथा सदस्यहरुको पारिश्रमिक र सुविधा सम्बन्धी ऐन, २०७३ को सम्बन्धित दफाहरु र अनुसूची–१ तथा अनुसूची–२ बमोजिम हुने व्यहोरा निर्देशानुसार अनुरोध छ ।”
संघीय संसद सचिवालयले यसअघि पूर्व प्रधानमन्त्री एवम् नेपाली कांग्रेसका सभापति शेरबहादुर देउवाले प्रमुख विपक्षी दलको हैसियतमा प्राप्त गर्ने सुविधा माग गरेको आधारमा यो पत्र लेखिएको जनाएको हो ।
प्रतिक्रिया राख्नुहोस्