महायज्ञको अघिल्लो दिन क्रिकेट रंगशाला निर्माणस्थलमा खुसी नै खुसी गल्छी गाउँपालिकाले दियो १०० टिपर बालुवा

धादिङको गल्छी गाउँपालिकाले रामपुरमा बन्दै गरेको गौतमबुद्ध अन्तर्राष्ट्रिय क्रिकेट रङ्गशालालाई १०० टिपर बालुवा उपलब्ध गराइएको छ । शनिबार धादिङबाट १०० वटा टिपरले बालुवा रङ्गशाला ल्याएका हुन् ।

गल्छी गाउँपालिका वडा नं ४ का अध्यक्ष राजु अधिकारीले एक टिपरमा २६५ क्युफिट रहेकोे र प्रति टिप मूल्य रु ३० हजार हाराहारी पर्ने जानकारी दिनुभयो । सबै बालुवा रु ३० लाख बराबरको रहेको थियो । गाउँपालिकाले बालुवा र धोएको खर्च बेहोरेको र नेपाल टिपर तथा ट्रक व्यवसायी समिति कलङ्कीले ढुवानीको व्यवस्था गरेको उहाँले जानकारी दिनुभयो ।

बालुवासहित गल्छी गाउँपालिकाका अध्यक्ष कृष्णहरि श्रेष्ठ, उपाध्यक्षसहित विभिन्न वडाका वडाध्यक्ष र सदस्य, विभिन्न बालुवा तथा टिपर व्यवसायीहरुको ठूलो समूह निर्माणाधिन क्रिकेट रंगशालामा आएको थियो । रंगशाला आएका सबैलाई फाउण्डेशनका अध्यक्ष धुर्मस र उपाध्यक्ष सुन्तलीले पालैपालो स्वागत गरे । त्यसअघि चितवन प्रवेश गर्ने नाका इच्छाकामना गाउँपालिकाले जनप्रतिनिधि, व्यवसायी तथा टिपर चालकहरुलाई गाउँपालिकाकी अध्यक्ष गिता गुरुङले स्वागत गरेकी थिइन् ।

स्वागत पछि आयोजित कार्यक्रममा बोल्दै गल्छी गाउँपालिकाका प्रमुख कृष्णहरि श्रेष्ठले गाउँपालिकाले जे सक्छ त्यही दिने निर्णय अनुसार बालुवा सहयोग गरिरहेको बताए । गल्छीको वडा नं। ४ मा बालुवा उत्खनन् गर्ने भएकाले बालुवा नै सहयोग दिँदा उपयुक्त देखिएकाले सहयोग प्रदान गरिएको प्रमुख श्रेष्ठले बताए । राष्ट्रिय गौरवको परियोजना निर्माण भैरहेकाले गाउँपालिका पनि त्यसमा हातेमालो गर्न तयार भएको प्रमुख श्रेष्ठले बताए ।

भरतपुर महानगरपालिका वडा नं १५ रामपुरमा रङ्गशाला निर्माणाधीन रहेको छ । रङ्गशालामा रु ५० करोड सङ्कलन गर्ने लक्ष्यका साथ आइतबारदेखि धनधान्याञ्चल महायज्ञसमेत लगाइँदै छ । रु दुई अर्ब ५० करोडको लगानीमा जनस्तरबाट रङ्गशाला निर्माण गर्न लागिएको हो । यसको नेतृत्व धुर्मुस सुन्तली फाउण्डेसनले गरेको छ ।