सरकार कृषि उत्पादन बढाएर व्यापारघाटा न्यून गर्ने भन्दै कृषिलाई उच्च प्राथमिकता दिएको भन्छ, तर किसानले उत्पादन गरेका तरकारीले बजार पाउन सकेको छैन ।
बजारमा भारतीय तरकारी छ्यापछ्याप्ती हुने तर नेपाली उत्पादनले मूल्य नपाउने अवस्था आएपछि शुक्रबार चितवनका किसानले भारतीय तरकारीले नेपाली तरकारी बजार विस्थापित गरेको भन्दै विरोधस्वरुप नारायणगढको पुलचोकमा तरकारी फालेका छन् ।
समयमा मल बीउ नपाइने र उत्पादित तरकारी बिक्री नहुने जस्ता समस्याबारे सरकार मूकदर्शक भएको आरोप किसानहरुले लगाएका छन् ।
पश्चिम चितवनका किसान कृष्णराज पराजुलीले उत्पादित तरकारी बिक्री गर्न नसकेपछि बाध्य भएर सडकमा फाल्नुपरेको गुनासो गर्नुभयो ।
उहाँले भन्नुभयो, “अहिले बजारमा भारतीय तरकारी छ्यापछ्याप्ती छ । नेपाली तरकारीले बजार पाएको छैन । खेतमा तरकारी कुहिएर जान्छ तर सडकमा आएपछि त सबैको आँखा पर्छ नि ।”
अहिले किसानको बोछबाट बन्दा पाँच रुपियाँ, फूल काउली १० रुपियाँ, गाजर पाँच रुपियाँमा पनि बिक्री गर्न गाह्रो भएको किसानहरुको गुनासो छ ।
प्रतिक्रिया राख्नुहोस्