बुधबार दिउँसो त्रिभुवन अन्तर्राष्ट्रिय विमानस्थलबाट टर्कीको राजधानी इस्तानबुलतर्फ उडेको टर्कीस एयरलाइन्सको वाइडबडी विमानको एउटा इन्जिनमा आगो लागेपछि सो विमान भारतको कोलकातातर्फ डाइभर्ट गरिएको छ।
२ सय २५ यात्रु बोकेको उडान नम्बर ‘टीएचवाई ७२७’ को जहाज त्रिभुवन विमानस्थलबाट बुधबार दिउँसो १ः२८ बजे उडेको लगत्तै ४ मिनेटमा दायाँ इन्जिनमा आगलागी भएको विमानस्थलका महाप्रबन्धक टेकनाथ सिटौलाले जानकारी दिनुभयो ।
महाप्रबन्धक सिटौलाले भन्नुभयो, ‘जहाजका क्याप्टेनले उडेको ४ मिनेटमै दायाँ इन्जिनमा आगलागी भएको खबर गरे । त्यसपछि चालकदलले जहाजलाई पश्चिम दिशामा लगेर दायाँ इन्जिन बन्द गरेर १० देखि १२ मिनेट होल्ड गर्यो ।’
सिटौलाका अनुसार आगलागी हुनासाथ दायाँ इन्जिन बन्द गरेपछि आगो नियन्त्रणमा आएको थियो । त्यसपछि बायाँ इन्जिनमात्र चलाएर टर्किसको जहाज कोलकाता डाइभर्ट भएको थियो ।
‘अहिले टर्किसको त्यो जहाज कोलकतामा सुरक्षित अवतरण भइसकेको छ । १५ मिनेट रोकिएको त्रिभुवन अन्तर्राष्ट्रिय विमानस्थल पनि सामान्य अवस्थामा सञ्चालनमा आइसकेको छ ।
प्रतिक्रिया राख्नुहोस्