जापानको राजधानी टोकियोमा एक ७४ वर्षीय वृद्धले एक युवतीलाई आफूसंग सम्बन्ध नराखे ‘एलियन’ले अपहरण गर्ने धम्की दिएर यौन शोषण गरेको आरोपमा मंगलबार पक्राउ गरिएको छ ।
बहुविवाह गरेका ७४ वर्षीय वृद्धले आफ्नी एक पूर्वपत्नीको सहायतामा युवतीलाई ‘एलियन’को मनगढन्ते कथा सुनाउँदै मोहजालमा फसाएर यौन सम्पर्क गर्न खोजेको आरोपमा पक्राउ गरिएको हो ।
अनुसन्धानकर्ताहरुका अनुसार हिरोहितो शिबुया नाम गरेको ती वृद्ध र उनकी ४३ वर्षीया पूर्वपत्नी चियाकीलाई जबरजस्ती यौन सम्बन्धका लागि ‘रचनात्मक प्रयास’ गरेको आशंकामा पक्राउ गरिएको हो ।
यो घटना गत वर्ष डिसेम्बर १२ मा पश्चिमी टोकियोको हिगासियामातो सहरमा रहेको शिबुयाको घरमा भएको हो । जहाँ दुईजनाले युवतीलाई भ्रमपूर्ण मोहजालमा पारेर यौन सम्बन्धको प्रयास गरेका थिए ।
शिबुयाले यस घटनाको आरोप अस्वीकार गरे पनि चियाकी भने मौन छिन् । सो घरमा उनी आफ्नी वर्तमान श्रीमती र चियाकी सहित आठ पूर्व श्रीमती र तीन बच्चाहरुसँगै बस्छन् ।
अनुसन्धानकर्ताहरुका अनुसार चियाकीले किशोरीलाई आफ्नो घरमा बोलाएर किशोरीलाई धेरै घण्टा ‘एलियन’को छवि देखाउँदै शिबुयाले युवतीलाई आफूसंग सम्बन्ध नराखे एलियन्सले अपहरण गर्ने भन्दै डर देखाएका थिए ।
त्यसपछि किशोरीले उनलाई विश्वास गर्दै फेरि भेट्ने वाचा गरिन् । तर, उनको परिवार र साथीहरूले उक्त घटनाको विषयमा प्रहरीमा जान सुझाव दिएपछि शिबुयाको पर्दाफास भएको हो ।
शिबुयाको यो घटना पहिलो भने होइन । उनलाई २००६ मा एक महिलालाई आफ्नो परिवारमा सामेल हुन बाध्य पार्ने प्रयास गरेको आरोपमा दोषी ठहर गरिएको थियो ।
प्रतिक्रिया राख्नुहोस्