राजनीति

भागरथी हत्याका दोषी पक्राउ नजीक पुगेको गृहमन्त्रीको दावी

गृहमन्त्री रामबहादुर थापाले माघ २२ गते बैतडीकी १७ वर्षीया किशोरी भागरथी भट्टलाई बलात्कारपछि हत्या गर्ने दोषी नजीक प्रहरी पुगेको बताउनुभएको छ ।



बढ्दो महिला हिंसाका घटनामा संलग्नलाई कारवाहीको माग गर्दै आज सर्वोच्च अदालत बार एशोसिएशन, महिला समितिको नेतृत्वमा मन्त्रालयमा गएको प्रतिनिधिमण्डलसँगको भेटमा मन्त्री थापाले सो घटनाका दोषीलाई छिट्टै पक्राउ गरी कानूनी कठघरामा उभ्याइने प्रतिबद्धता जनाउनुभयो ।

भट्टसम्बन्धी घटना कञ्चनपुरकी निर्मला पन्तको जस्तो जटिल नरहेको जनाउँदै उहाँले विगतबाट पाठ सिकेर टुङ्गोमा पु¥याउने गरी छानबिन प्रक्रिया अघि बढेको बताउनुभयो ।

महिला हिंसा रोक्न सरकार गम्भीर रहेको र त्यसैका लागि नेपाल प्रहरीमा महिला सेल स्थापना गरिएको स्पष्ट गर्दै उहाँले हिंसा, बलात्कारका घटना हुन नदिन र भएमा तत्काल दोषी पहिचान गरी कानूनी कारवाही अघि बढाउन प्रहरीलाई निर्देशन दिइसकिएको बताउनुभयो ।

महिला कानून व्यवसायीले सो घटनाको प्रभावकारी अनुसन्धान गरी दोषीलाई कारवाही गर्न माग गर्दै मन्त्री थापालाई ज्ञापनपत्रसमेत बुझाएका छन् । विसं २०७५ साउन ११ मा कञ्चनपुरकी पन्तको बलात्कारपछि हत्या भएकामा दोषी अहिलेसम्म पहिचान हुन नसकिरहेका बेला भट्टको पनि बलात्कारपछि हत्या भएको थियो ।

हत्याको अनुसन्धानका लागि सुदूरपश्चिम प्रदेश प्रहरी प्रमुख प्रहरी नायब महानिरीक्षक (डिआइजी) उत्तम सुवेदी आफैं खटिनुभएको छ । उहाँ १० दिनदेखि बैतडीमा हुनुहुन्छ । डिआइजी सुवेदीले समग्र अनुसन्धानको निगरानी, निर्देशन र अनुगमन गर्ने काम गरिरहनुभएको छ ।

यो घटनालाई निर्मला पन्त बलात्कारपछि हत्या गरिएको घटना जस्तै अपराधी पत्ता नलगाउने जोखिम लिने मनस्थितिमा प्रहरी नरहेको बुझिएको छ ।

सम्बन्धित खबर

Back to top button