बाग्लुङ समाज जापानले आउँदो अप्रिल ४ तारिखका दिन राजधानी टोकियोमा दोश्रो रनिङ कप पुरुष भलिबल प्रतियोगिता गर्ने भएको छ ।
नेपालको राष्ट्रिय खेल भलिबललाई चैतेदसैंको अवसर पारेर प्रवासमा रहेका खेलाडी र खेलकुदको विकासमा टेवा पुर्याउने उद्देश्यले आयोजना हुन लागेको जनाइएको छ ।
प्रतियोगिता संचालन गर्नका लागि समाजले विभिन्न उपसमिति गठन गरी जिम्मेवारी बाँडफाडका साथ तयारी थालेको कार्यवहाक अध्यक्ष यमकान्त कँडेलले बताउनुभयो ।
समाजले कार्यक्रम संयोजकको जिम्मेवारी कार्यसमिती सदस्य बसन्त थापालाई प्रदान गरेको छ भने कार्यक्रमको सम्पूर्ण ब्यवस्थापकीय जिम्मेवारी उपाध्यक्ष गुरुप्रसाद सापकोटालाई दिइएको महासचिव राजु केसीले जानकारी दिनुभयो ।
त्यसै गरी आर्थिक, प्रचार प्रसार स्वयंसेवक तथा अतिथी ब्यवस्थापक लगायतमा पनि जिम्मेवारी बाँडफाड गरी तयारी अगाडि बढाइएको छ।
प्रतियोगितामा प्रथम हुने टोलीलाई नगद २ लाख ८५ हजार ५ सय ५५ येन मेडल र प्रमाण पत्र, द्वितीय हुनेलाई नगद १ लाख ८५ हजार ५ सय ५५ येन मेडल र प्रमाणपत्र तथा सेमिफाइनलिष्ट दुवै समूहलाई सान्त्वना पुरस्कार स्वरूप ५५ हजार ५ सय ५५ येन र प्रमाणपत्र प्रदान गरिने बताइएको छ ।
यसका साथै प्रतियोगितामा बेष्ट प्लेयर, बेष्ट स्पिकेर, बेष्ट डिफेण्डेर, बेष्ट लिफ़्टर र बेष्ट कोचलाई पनि आकर्षक पुरस्कार प्रदान गरिनेछ ।
प्रतियोगितामा अफिसियल सहित १२ खेलाडीको सहभागिता रहनसक्ने र खेल प्रचलित नियम अनुसार नकआउट आधारमा नेपाली रेफ्रीद्वारा संचालन गरिने छ ।
प्रतियोगिता टोकियोको सिन्जुकु कज्मिक सेन्टरमा बिहान ९ बजे देखि संचालन हुनेछ । खेलमा सहभागिताको लागि प्रवेश शुल्कको रूपमा प्रति समूह ४० हजार येन तोकिएको छ ।
प्रतियोगिताको उत्कृष्ट खेलाडीलाई जापानमा नेपालीहरूद्वारा संचालित मिराई लाईफ स्वास्थ्य बीमाले मिराई लाईफ उत्कृष्ठ खेलाडीको विशेष पुरस्कार प्रदान गर्नेछ।
प्रतियोगितामा टिम सहभागिताका लागि आयोजकसंग सम्पर्क गर्न अनुरोध गरिएको छ।
प्रतिक्रिया राख्नुहोस्