मुलुकमा रोजगारी सिर्जना गरी युवाहरुलाई स्वदेशमै रोक्ने नीति लिएको दावी सरकारले गरिरहँदा विदेशमा श्रम गर्न जानेको संख्या भने ह्वात्तै बढेको छ । त्यस्तै अध्ययनका लागि विदेश जानेको संख्या पनि उच्च रहेको छ ।
वैदेशिक रोजगार विभागका अनुसार चालू आर्थिक वर्षको साउनदेखि माघसम्म महिनासममा साढे चार लाखभन्दा बढी नेपाली युवा रोजगारीको खोजीमा मलेसिया, खाडीलगायतका मुलुकमा गएका छन् ।
यसै अवधिमा विदेशमा अध्ययन गर्न जानेको संख्या पनि बढेको छ । शिक्षा, विज्ञान तथा प्रविधि मन्त्रालय अन्तर्गतको वैदेशिक अध्ययन अनुमति शाखाका अनुसार गत साउनदेखि पुस मसान्तसम्ममा ४५ हजार ९१२ जनाले नो अब्जेक्सन लेटर लिएका छन् ।
स्वदेशमा रोजगारी र सुलभभ र गुणस्तरीय शिक्षाको प्रत्याभूति नारामै सीमित हुँदा युवाहरु विदेश पलायन हुने क्रम घट्नुको साटो झनझन् बढिरहेको उपरोक्त र्दु तथ्यांकले नै देखाएको छ ।
वैदेशिक रोवगार विभागका अनुसार साउनदेखि माघ महिनासम्मम चार लाख ६२ हजार जनाले श्रम स्वीकृति लिएका छन् । तीमध्ये सबैभन्दा धेरै मलेसिया र कतार, साउदी अरब, संयुक्त अरब इमिरेट्स, कुवेत, बहराइन, ओमान जानेको हिस्सा ८० प्रतिशत छ भने बाँकी अन्य देशमा गएका छन् ।
पछिल्लो समय साउदी अरब जानेको सङ्ख्या घटेको छ भने मलेसिया र कतारमा नेपाली श्रमिकको सेवासुविधा र माग बढेका कारण ती देशमा जाने युवाको सङ्ख्या उल्लेख्य वृद्धि भएको छ ।
सात महिनामा सबैभन्दा धेरै मलेसियामा जानका लागि श्रम स्वीकृति लिएका छन् । मलेसियाका लागि श्रम स्वीकृति लिनेको सङ्ख्या २० हजार छ । सो अवधिमा कतारका लागि १२ हजार ७०४, साउदीका लागि १० हजार ५७६, संयुक्त अरब इमिरेट्स )यूएई) नौ हजार ७७० र कुवेतका लागि दुई हजार ९९२ जनाले श्रम स्वीकृति लिएका छन् ।
पछिल्लो पटक विगतको तुलनामा युरोप र एसियाली मुलुकमा श्रम स्वीकृति लिएर रोजगारीमा जानेको सङ्ख्या बढ्न थालेको छ ।
गत माघ महिनामा रोमानिया जान ८०४, जापान ८८२, साइप्रस ४१७, क्रोएसिया ४७१, माल्टा २७०, पोल्यान्ड ७२० र पोर्चुगल जान ४५ जनाले श्रम स्वीकृति लिएको विभागले जनाएको छ ।
पछिल्लो समयमा संस्थागत र व्यक्तिगत रूपमा श्रम स्वीकृति लिएर १२० देशमा नेपाली पुगेका छन् । श्रम स्वीकृति नलिई जानेको सङ्ख्या पनि हजारौँमा छ । अमेरिका, अस्ट्रेलिया, क्यानडा, बेलायतजस्ता मुलुकमा पनि नेपाली काम गर्न गएका छन् । यी मुलुकमा डिपेन्डेन्टका रूपमा काम गर्न जाने धेरै छन् ।
विभागका अनुसार चालू आर्थिक वर्ष २०७९/८० को साउनमा ६३ हजार, भदौमा ७६ हजार, असोजमा ५६ हजार, कात्तिक र मङ्सिरमा ६८/६८ हजार, पुसमा ६५ हजार र माघमा ६४ हजारले श्रम स्वीकृति लिएका छन् ।
गत वर्ष आर्थिक वर्ष २०७८/७९ मा छ लाख ३० हजारले श्रम स्वीकृति लिई विदेशिएका थिए । विभागका अनुसार साउनपछि लगातार उकालो लागेको विदेश जाने क्रम हालसम्म कायम छ ।
प्रतिक्रिया राख्नुहोस्