जन सरोकार

सेनाद्वारा मोदीवेणी धामका वृद्धवृद्धालाई खाद्यान्न वितरण

हरेक वर्ष महाशिवरात्रिका दिनमा पर्ने नेपाली सेना दिवसका अवसरमा पर्वतको केवलजङ्ग गुल्मले मोदीवेणीमा रहेको वृद्धाश्रममा खाद्यान्न वितरण गरेको छ ।

परिवार छाडेर वृद्धाश्रममा बस्दै आएका ज्येष्ठ नागरिकलाई बेला बेलामा खाद्यान्न सङ्कट हुने गरेको छ । खाद्यान्न सङ्कट पर्न नदिन दिवसको अवसरमा वृद्धाश्रममा रहेका १२ ज्येष्ठ नागरिकका लागि चामल, दाल, तेल, चिनी, नुन, बिस्कुटलगायतका खाद्यान्न वितरण गरिएको गुल्मपति सेनानी रमेश थापाले जानकारी दिनुभयो ।

“हरेक वर्ष महाशिवरात्रिकै दिनमा हामीले सेना दिवस मनाउँदै आएका छौँ, वृद्धाश्रममा बस्दै आउनुभएका ज्येष्ठ नागरिकलाई केही हदसम्म भए पनि सहयोग होस् भन्ने हेतुले मोदीवेणीमा पुगेर खाद्यान्न सहयोग गरिएको हो”, उहाँले भन्नुभयो, “सेना दिवसको अवसर पारेर गुप्तेश्वर गुफामा रहने र अन्य ठाउँका केहीलाई पनि खाद्यान्न सहयोग गरेका छौँ ।”

सेना दिवसको पूर्वसन्ध्यामा तीन दिन अगाडिबाट नै जिल्लाका विभिन्न स्थानमा रहेका धार्मिकस्थलमा सेनाले सरसफाइ गरेको थियो । सैनिक नागरिक सम्बन्ध स्थापनाका लागि सेनाले विभिन्न काम गर्दै आइरहेकामा सो कामले पनि नागरिक र सैनिकबीच सरल सम्बन्ध बन्ने अपेक्षा सेनाले गरेको सहसेनानी रघुनाथ रुपाखेतीले बताउनुभयो । नृसिंह मन्दिर संरक्षण तथा धार्मिक पर्यटकीय विकास समितिका अध्यक्ष केशवदास वैरागीका अनुसार घाटसम्म पुग्ने बाटोलाई सजिलो बनाउने, दिव्य धाम र आसपासको क्षेत्रमा सरसफाइ गर्ने लगायतका काम सेनाले गर्दै आएको छ ।

सम्बन्धित खबर

Back to top button