राजनीति

ओलीको नेतृत्वमा माधव नेपाल सहित २७ सांसदको एमाले संसदीय बोर्ड गठन

प्रधानमन्त्री तथा नेकपा एमाले अध्यक्ष केपी ओलीको अध्यक्षतामा बालुवाटारमा बसेको नेकपा एमाले संसदीय दलको बैठकले झलनाथ खनाल र माधव नेपालसहित २७ सदस्यीय संसदीय बोर्ड गठन गरेको छ ।



त्यसै गरी संसदीय दलको विधान संशोधनका लागि कार्यदल गठन गरेको छ । प्रधानमन्त्री निवास बालुवाटारमा बसेको एमाले संसदीय दलको बैठकले दलको विधान संशोधनसम्बन्धी प्रस्ताव पारित गर्नका लागि प्रमुख सचेतक विशाल भट्टराईको संयोजकत्वमा तीन सदस्यीय कार्यदल गठन गरेको हो ।

कार्यदलका सदस्यमा प्रतिनिधिसभाबाट शेरबहादुर तामाङ र राष्ट्रियसभाबाट विमला पौडेल रहनुभएको छ । तामाङले एमालेको संसदीय दलको विधान विसं २०७२ यता संशोधन नभएकाले सोका लागि कार्यदल गठन गरिएको जानकारी दिनुभयो । यही चैत ७ गते बस्ने संसदीय दलको अर्को बैठकले संशोधन विधान पारित गर्ने बताइएको छ । उहाँले पुरानो विधानका आधारमा २५ सदस्यीय संसदीय बोर्डसमेत गठन गरिएको बताउनुभयो ।

बोर्डमा संसदीय दलका नेता तथा प्रधानमन्त्री केपी शर्मा ओली, उपनेता सुवास नेम्वाङ, प्रमुख सचेतक भट्टराई र सचेतक शान्ता चौधरी पदेन सदस्यका रूपमा रहनुभएको छ ।

यस्तै बोर्ड सदस्यमा झलनाथ खनाल, माधवकुमार नेपाल, सुमन प्याकु¥याल, खिमलाल भट्टराई, पौडेल, तामाङ, डा बिन्दा पाण्डे, राधाकुमारी ज्ञवाली, दामोदर भण्डारी, विद्या भट्टराई, छविलाल विश्वकर्मा, रघुवीर महासेठ, रेखा झा, नारदमुनि राना, मोहन बानियाँ, विमला विक, भूपेन्द्र थापा, राजेन्द्र राई, खेम लोहनी र सरिता न्यौपाने रहनुभएको छ । एक जना पछि मनोनयन गरिने जनाइएको छ । उहाँले बैठकमा नआउनेलाई कारवाही गर्नका लागि कुनै छलफल नगरिएको स्पष्ट पार्नुभयो ।

यसै गरी बैठकले गुटगत भेला नगर्न र पार्टीबाहेक अरु कसैको निर्देशन नमान्‍न सांसदहरुलाई निर्देशन दिँर्दै पार्टीको विधान र निर्णयविरुद्ध गुट भेलामा जानेलाई एमालेले कारबाहीको प्रक्रिया अगाडि बढाउने भएको छ ।

त्यसै गरी बैठकले गुट भेलामा जानेहरुलाई आत्मलोचनासहित दल र पार्टीको कार्यक्रममा सहभागी हुन बैठकले अपिल पनि गरेको छ । तर, पार्टीको निर्देशन नमानी अवैधानिक गतिविधिमा संलग्न भइरहे कारबाही प्रक्रिया अगाडि बढाउने निर्णय दलको बैठकले गरेको बताइएको छ ।

सम्बन्धित खबर

Back to top button