विश्व समाचार

चीनले बनाएको कोरोना भ्याक्सिन परीक्षण सफलताको नजिक, सुई लगाएकाहरु सबै स्वस्थ

कोरोना भाइरसको उत्पन्न भएको मुलुक चीनले कोरोना संक्रमणलाई चामत्कारिक रुपमा नियन्त्रण गरेसंगै त्यहाँ आविष्कार गरिएको कोरोना भाइरस (कोभिड–१९)को सुई (भ्याक्सिन) लगाएका चिनियाँ स्वयंसेवकहरुको पहिलो टोली स्वस्थ रहेको बताइएको छ ।

सुई लगाएपछि १४ दिने क्वारेन्टाइनको बसाईंमा उनीहरु सबै स्वस्थ रहेको डेलीमेलले जनाएको छ । उहानमा गरिएको उक्त पहिलो परीक्षणमा भाग लिएका १४ जना स्वयंसेवकहरुको घरमा हिजो फिर्ता भएका हुन् । शुक्रबारसम्म १०८ जना स्वयंसेवकहरुमध्ये १८ जनाले सबै स्वास्थ्य परीक्षण गरिसकेको छन् ।

सबै स्वयंसेवकहरुलाई छ महिनासम्म वैज्ञानिकहरुले निगरानीमा राख्नेछन् र पछि उनीहरुको रगतको नमूना लिएर एन्टीबडिज्लाई सूक्ष्म रुपमा अनुसन्धान गरिनेछ । यदि यो सुई प्रभावकारी र भरपर्दो भएको पत्ता लागेमा वैज्ञानिकहरुले विदेशमा थप अनुसन्धान गर्ने बताएका छन् ।

यसैबीच चीनमा कोरोनाभाइरसका कारण निधन भएकाहरुको सम्झना गर्दै शनिबार राष्ट्रिय शोक कार्यक्रमको आयोजना गरिएको छ । कोरोनाभाइरसका कारण ज्यान गुमाएकाको स्मृति गर्दै उनीहरूप्रति श्रद्धाञ्जलि व्यक्त गर्न देशभर तीन मिनेट मौनधारण गरिएको छ ।

चीनले हरेक वर्ष अप्रिल ४ लाई स्वर्गीयजनको सम्झना गर्ने परम्परागत छिङमिङ पर्वमा देशभर विभिन्न प्राकृतिक विपत्तिमा ज्यान गुमाउनेको स्मरण रहँदै आएकोमा यस वर्ष वुहान लगायत देशका विभिन्न भागमा कोरोनाभाइरस सङ्क्रमणका कारण ज्यान गुमाउने नागरिक, स्वास्थ्यकर्मी तथा अग्रमोर्चामा रहेर काम गर्ने क्रममा ज्यान गुमाउने व्यक्तिप्रति पनि सम्मान गरिएको हो ।

चीनमा कोरोना भाइरसका कारण तीन हजार ३२२ जनाकोे मृत्यु भएको छ भने ८१ हजार ६३९ जनामा सङ्क्रमण पुष्टि भएको छ । सङ्क्रमितमध्ये ७६ हजार ७५५ जना निको भएर घर फर्किसकेका छन् । मुख्यभूमि चीनमा विगत २४ घण्टामा नयाँ सङ्क्रमितको सङ्ख्या १९ रहेको छ भने चार जनाको मृत्यु भएको छ । उनीहरु सबैको स्मृति दिवस शनिबार रहेको थियो ।

स्थानीय समय अनुसार शनिबार बिहान १० बजे चीनभर सर्वसाधारणहरु उभिएर तीन मिनेट मौनधारण गरेका छन् । गन्तब्यमा रहेका यातायातका साधन कार, रेल तथा पानीजहाजहरुले साइरन बजाएर मृतकप्रति श्रद्धा व्यक्त गरे ।

कोरोनाभाइरसका साथै अन्य विपत्तिमा ज्यान गुमाएका नागरिकको सम्मानका लागि आयोजना गरिएको कार्यक्रममा चिनियाँहरूले कतिपय स्थानमा समूहमा भेला भई राष्ट्रिय झण्डामुनि छातिमा सेतो फुल टाँसेर मृतात्माप्रति श्रद्धा पनि व्यक्त गरेका थिए ।

सम्बन्धित खबर

Back to top button