नेपालको विकास साझेदार मुलुक जापानले भक्तपुरको सूर्यविनायक नगरपालिकास्थित सामुदायिक स्वास्थ्य केन्द्रलाई स्वास्थ्य सामग्री हस्तान्तरण गरेको छ ।
जापान सरकारको ग्रासरुट ह्युमन सेक्युरिटी प्रोजेक्ट (जीजीपी) अनुदान सहायता अन्तर्गतको सो सहायता नेपालका लागि जापानी राजदूत किकुता युताकाको उपस्थितिमा हस्तान्तरण गरिएको हो ।
सो अवसरमा बोल्दै राजदूत किकुताले परियोजनामा संलग्न सबैको प्रयासलाई बधाई तथा प्रशंसा गर्नुहुँदै अब मधुमेह, स्तन क्यान्सर र थाइरोइड डिसफंक्शनको प्रारम्भिक पहिचान महत्त्वपूर्ण भएकोमा जोड दिनुभयो ।
यो परियोजनाले यी रोगहरूको प्रारम्भिक पहिचान गर्न सक्षम हुने र व्यक्ति, परिवार र अन्ततः सम्पूर्ण समुदायको लागि राम्रो स्वास्थ्य र जीवनको गुणस्तरमा योगदान पुर्याउनेमा उहाँको विश्वास छ ।
उहाँले यस परियोजनाको नतिजाले स्थानीय स्वास्थ्य सेवाको विकासमा मात्र नभई समग्र समुदायको विकासमा योगदान पुर्याउँदै जापान र नेपालका जनताबीचको मित्रतालाई अझ प्रगाढ बनाउने विश्वास पनि व्यक्त गर्नुभयो ।
श्रमिक महिला तथा बाल कल्याण परिषद् (LWCWC)द्वारा सञ्चालित उपत्यका स्वास्थ्य केन्द्रमा स्तन क्यान्सर परीक्षण, थाइराइड परीक्षण र मधुमेह परीक्षणका लागि मेडिकल उपकरण जडान गर्न लगभग ८ करोड ९० लाख रुपैयाँको लागतमा जडान गरिएका उपकरण हस्तान्तरण गरिएको हो ।
१९९६ मा स्थापना भएदेखि बाल कल्याण परिषद्ले निःशुल्क जन्म सहायता र आधारभूत औषधिहरू उपलब्ध गराएर ग्रामीण क्षेत्रमा मातृ र बाल स्वास्थ्य सेवामा ध्यान केन्द्रित गरेको छ ।
त्यस्तै यस केन्द्रका डाक्टर र नर्सहरू नियमित रूपमा वरपरका समुदायहरूमा परामर्श प्रदान गर्न र आधारभूत स्वास्थ्य समस्याहरूको बारेमा चेतना जगाउनको लागि विभिन्न कार्यक्रम गर्दै आएका छन् ।
यसअघि केन्द्रमा पहिले आवश्यक चिकित्सा उपकरणको अभावको कारण स्तन क्यान्सर, थाइराइड रोग र मधुमेहको लागि परीक्षण गर्न असमर्थ थियो । यस परियोजनापछि केन्द्र यी रोगको नियमित रूपमा र सही समयमा उपचार गर्न सक्छ।
सामुदायिक सामाजिक(आर्थिक विकासका लागि तल्लो तहका मानिसहरूलाई प्रत्यक्ष रूपमा लाभान्वित हुने परियोजनाहरू कार्यान्वयन गर्न जीजीपी स्थापना गरिएको हो । सन् १९९१ देखि नेपालमा २०० भन्दा बढी जीजीपी परियोजनाहरू कार्यान्वयन भइसकेका छन्।
प्रतिक्रिया राख्नुहोस्