राजनीति

पूर्वमन्त्री जोशीको दैनिकी- न पूर्वपदको दम्भ, न विलासी जीवन, गरीब असहायको सेवा

पूर्व वातावरण मन्त्री जयदेव जोशी

राजनीति सेवा कि पेशा भन्ने बहस चलिरहेको छ । केही युवा राजनीतिकर्मीहरुले घरव्यवहार चलाउन व्यवसाय गर्नुपर्छ भन्दै सुरुवात गरिरहेका भए पनि अधिकांश राजनीति गर्नेहरु एकपटक मन्त्री, सांसद मात्र हैन गाविस अध्यक्ष बनेपछि विलासी जीवन बिताउने हैसियतमा पुग्ने गरेका छन् ।

यस्तो वातावरणमा केही नेताहरु अपवादका रुपमा रहेका छन् । उनीहरुमा विगतमा निर्वाह गरेको पदको कुनै दम्भ छैन । उच्च ओहोदामा पुगेपछि विगतको कर्मलाई बिर्सने र विलासिताको जीवन जिउने प्रचलनजस्तै बनिरहेको छ । तर पूर्वमन्त्री जयदेव जोशीको जीवनशैली भने फरक छ । कञ्चनपुरको भीमदत्त नगरपालिका–१८ का ६४ वर्षीय पूर्वमन्त्री जोशी न्याय क्षेत्रको सक्रियतालाई निरन्तरता दिँदै आउनुभएको छ ।

विसं २०२८ देखि राजनीति र २०३६ देखि लेखापढी व्यवसायमा आबद्ध पूर्वमन्त्री जोशी नेकपा संयुक्तको केन्द्रीय पोलिटब्यूरो सदस्यसम्मको जिम्मेवारी बहन गरिसकेको बताउनुहुन्छ । विसं २०७२ मा जनसङ्ख्या तथा वातावरणमन्त्रीको जिम्मेवारी सम्हाल्नुभएका जोशील अहिले कञ्चनपुरमा वकालत पेशा गरिरहनुभएको छ । “एघार महिना पार्टीको जिम्मेवारीअनुसार मन्त्री भएर काम गरेँ । धेरैले काठमाडौँमै बसेर राजनीतिमा सक्रिय हुन भने तर म गृहजिल्लामै आएर पुरानै पेशामा फर्किएँ ।”

सामान्य परिवार र सामान्य जीवनयापन गरिरहनुभएका जोशीले यहाँ लामो समयदेखि न्यायमा पहुँच नभएका र आर्थिक अवस्था कमजोर सेवाग्राहीलाई निःशुल्क कानूनी सेवा दिइरहेको बताउनुभयो । दार्चुलाको लेकम गाउँपालिकामा जन्मिनुभएका जोशी लेखापढीबाटै अधिवक्ता भएको एघार वर्ष भइसकेको बताउनुहुन्छ । “मन्त्री हुँदा अन्तर्राष्ट्रिय मञ्चमा मौसम परिर्वतन र त्यसको हिमालमा पर्ने असरका बारेमा बोलेँ”, उहाँले भन्नुभयो, “पदमा रहँदा कहीँकतैबाट लाभ लिने विषय सोच्नसम्म सोचिनँ ।” उहाँले लामो समयदेखि वकालत पेशामा रहँदा पाएको स्नेह र सम्बन्धलाई जीवन्त राख्न सक्रिय रहेको बताउनुभयो ।

नेकपा संयुक्तले अघिल्लो निर्वाचनमा समानुपातिकतर्फबाट तीन सांसद पाएको थियो । “पार्टीले क्षेत्र, भेग र वर्ग मिलाउँदा सुदूरपश्चिमबाट मलाई सांसद बनाएको थियो”, उहाँले भन्नुभयो, “अहिले पनि राजनीतिसँगै वकालत पेशामा संलग्न छु ।” छोरा–बुहारीलाई काठमाडौँमा व्यवस्थापन गरेर श्रीमतीसँगै महेन्द्रनगरमा बसिरहनुभएका जोशीले वकालत पेशाबाट पाइने पारिश्रमिकबाट खर्च चलिरहेको बताउनुभयो ।

“एकपटक मन्त्री हुँदा पटक–पटक त्यही पदको आडमा थुप्रै फाइदा लिएका र लिने गरेका मान्छे देखेको छु, म मन्त्री पद त्यागेको १० मिनेटमै सरकारी गाडी र सुरक्षागार्ड फिर्ता पठाएको मान्छे हुँ” उहाँले भन्नुभयो । उहाँले उमेर पाको अवस्थामा पुगे पनि न्यायका लागि गुहार माग्न आउनेहरूको कमी नआएको बताउनुभयो । “पद क्षणिक हुन्, समाजसितको सम्बन्ध जहिल्यै सुमधुर भए मात्रै जिउनुको मजा आउँछ”, उहाँले भन्नुभयो, “अहिले त राजनीति आर्थिक मुनाफा र भ्रष्टाचारसित जोडिएको देख्दा उदेक लागेर आउँछ ।”

नागरिकहरू अधिकारप्रति सचेत भइरहेकै कारण अहिले न्यायका निम्ति आउने क्रम पनि बढिरहेको उहाँको भनाइ छ । घरमै साइनिङ पाथ ल–फर्म सञ्चालन गरिरहनुभएका जोशीले सिद्धान्तको अनुसरण गरेर राजनीतिमा लाग्नेभन्दा स्वार्थ राखेर सक्रिय हुने क्रम मुलुकका लागि हितकर नहुने बताउनुभयो । सधैँ सामान्य जीवन जिउन रुचाउने पूर्वमन्त्री जोशी काठमाडाँैसम्मको यात्रा सधैँ सार्वजनिक बसबाट गर्दै आएको बताउनुभयो । “एकपटक बसमा गएको देखेपछि एउटा साथीले जबर्जस्ती जहाजको टिकट बनाएर काठमाडौँ पठाए”, जोशीले भन्नुभयो, “मन्त्री हुँदा पनि मैले सुखसयल हेरिनँ ।”

सम्बन्धित खबर

Back to top button