अमेरिका र वेस्टइन्डिजमा जारी टी-२० विश्वकप क्रिकेटमा इंग्ल्यान्ड विजयी भएको छ । शुक्रबार बिहान भएको खेलमा इंग्ल्यान्डले ओमानलाई ८ विकेटले पराजित गरेको हो।
जितसँगै इंग्ल्यान्डको सुपर-८ मा पुग्ने सम्भावना कायमै राखेको छ । टस हारेर पहिले ब्याटिङ गरेको ओमान १३. २ ओभरमानै ४७ रनमा समेटियो । ओमानका लागि सोइब खानले ११ रन बनाउनु बाहेक अन्य कुन खेलाडीले दोहोरो अंकमा रन जोड्न सकेनन् । इंग्ल्यान्डका लागि अदिल रसिदले ४ विकेट लिँदा मार्क वुड र जोफ्रा आर्चरले ३-३ विकेट लिए ।
ओमानले दिएको ४८ रनको लक्ष्य इंग्ल्यान्डले ३.१ ओभरमै २ विकेट गुमाएर पूरा गर्यो । इंग्ल्यान्डका लागि जोस बटलरले २४ रन बनाए भने फिल साल्ट १२ रन जोड्दा विल ज्याकले ५ र जोनी ब्रेस्टोले ८ रन बनाए । ओमानका लागि बिलाल खान र कलिमुल्लाहले समान १-१ विकेट लिए । जितसँगै इंग्ल्यान्ड ३ अङ्कसहित समूह ‘बी’ को तेस्रो स्थानमा रहेको छ ।
प्रतिक्रिया राख्नुहोस्