बेचन झा पक्राउ पर्नु नै प्रचण्ड सरकार ढल्नुको कारण हो ?

अर्थमन्त्री एवं माओवादी केन्द्रका उपमहासचिव वर्षमान पुनले सत्ता परिवर्तनको मुख्य कारण नक्कली शरणार्थी प्रकरणमा बेचन झा पक्राउ पर्नु रहेको बताउनुभएको छ ।

उहाँले नक्कली शरणार्थी प्रकरणमा प्रहरीको प्रतिवेदनमा कांग्रेसका शीर्ष नेता संलग्न रहेको उल्लेख रहेको र मुख्य मतियार मानिएका झा पक्राउ परेपछि प्रमुख प्रतिपक्षी कांग्रेस आत्तिएर समीकरण फेरबदलमा लागेको उहाँको आरोप छ ।

आगामी आर्थिक वर्षको बजेटमाथि एमालेले नै असन्तुष्टि जनाइरहेका बेला सरकार परिवर्तनको कारण त्यो पनि हो कि भन्ने जिज्ञासामा नेता पुनले बजेट बहाना मात्रै भएको बताउनुभयो ।

उहाँले भन्नुभयो “समस्या बजेटमा होइन । बेचन झाबाट समस्या भएको हो । झा पक्राउ परेपछि कांग्रेस साह्रै डरायो । प्रहरीको प्रतिवेदनमा कांग्रेसका शीर्ष नेता संलग्न रहेको उल्लेख छ । यस विषयमा पार्टीको बैठक बसेर थप निर्णय लिइन्छ ।”

मन्त्री पुनले अब आफ्नो पार्टी प्रतिपक्षमा बस्ने बताउँदै नेकपा एमालेका अध्यक्ष केपी शर्मा ओलीले दोहोरो भूमिका खेलेर जिल्याएकोमा आश्चर्य व्यक्त गर्नुभयो ।

आइतबार र सोमबार प्रधानमन्त्री प्रचण्ड र ओलीबीच छलफल हुँदा अहिलेकै गठबन्धनलाई थप बलियो बनाएर जाने सहमति भएको र सोमबार बसेको मन्त्रिपरिषद् बैठकमा समेत प्रधानमन्त्री प्रचण्डले अहिलेकै गठबन्धन कायम रहने ब्रिफिङ गर्नुभएको थियो ।

तर, सोमबार मध्यरातमा सत्ता समीकरण बदलियो । गत पुस १० गते दउवालाई झुक्याएर प्रचण्डलाई प्रधानमन्त्री बनाउनुभएका ओलीले यसपटक देउवालाई झुक्याएजस्तै गरी प्रचण्डलाई जिल्याउन सफल हुनुभएको छ ।

तर यसपटक सत्ता स्वार्थ मात्र नभएर ठूला भ्रष्टाचारका फाइल खोल्ने सरकारको तयारीपनि शीर्ष नेताहरु पक्राउ पर्ने अवस्था आएपछि सरकार नै ढाल्ने निष्कर्षमा दुबै नेता पुगेको विश्लेषकहरुको टिप्पणी रहेको छ ।

सोमबार मात्रै गृह मन्त्री रवि लामिछानेले संसदमा भ्रष्टाचारका २५ वटा ठूला फाइल खोल्ने तयारी भएको र शक्तिशाली आयो गठन गरी सबै काण्डहरुको छानबिन गर्ने तयारी रहेको बताउनुभएको थियो ।

यसको संकेतका रुपमा सुन तस्करीको नालिबेली सार्वजनिक भयो भने नक्कली भुटानी शरणार्थी प्रकरणका नाइके भनिएका बेचन झा पक्राउ परेका थिए । यसैबाट दुबै दल आत्तिएको विश्लेषण गर्न थालिएको छ ।