विगतका दुई चरणमा देशभरमै सबैभन्दा बढी संक्रमण देखिएको लुम्बिनी प्रदेशमा जनजीवन सहज बन्दै गएसंगै कोरोना संक्रमणबाट बिरामी हुनेहरुको संख्या बढ्न थालेको छ । अहिले एक सय जनाको पीसीआर परीक्षण गर्दा औसत ३० जनामा कोरोना संक्रमण पुष्टि हुने गरेको छ ।

लुम्बिनी प्रादेशिक अस्पतालका कोरोना फोकल पर्सन डा. नन्दु पाठकका अनुसार रुपन्देहीसहित छिमेकी जिल्लाहरु अर्घाखाँची, गुल्मी, कपिलवस्तु लगायतका जिल्लाबाट आएकाहरुमा कोरोना संक्रमण बढी देखिएको र हरेक दिन कोरोना संक्रमण दर बढ्दो क्रममा रहेको छ ।

निषेधाज्ञा खुकुलो भएर सार्वजनिक यातायात सहित सबैखाले व्यवसाय सञ्चालनमा आएसँगै स्वास्थ्य सुरक्षामा हेलचेक्र्याइ र बजार र सार्वजनिक यातायातमा यात्रुको भीडभाड बढेको हुँदा संक्रमण दर पनि बढेको चिकित्सकहरु बताउँछन् ।

संक्रमित हुनेमा व्यवसायी, पेशाकर्मी लगायत कामकाजी उमेर समूहका रहेका छन् । संक्रमित विरामी बढेसँगै लुम्बिनी प्रादेशिक अस्पतालको कोरोना वार्डको आईसीयूका २० वटै बेड भरिभराउ रहेका छन् । यस्तै २६ वटा एचडीयू बेडमध्ये १५ बेडमा र इमर्जेन्सीमा ११ जना कोरोना संक्रमित विरामी भर्ना भएका डा. पाठकले जानकारी दिनुभयो ।

लुम्बिनी प्रादेशिक अस्पतालको फिभर क्लिनिकमा १ साउनदेखि १७ साउनेसम्म ११६ जनामा उच्च ज्वरो देखिएको फिभर क्लिनिकमा कार्यरत प्यारामेडिक्स कमल गौतमले बताउनुभयो । परीक्षण गर्नेमध्ये ३० प्रतिशतभन्दा बढीमा कोरोना देखिएको छ । पछिल्लो २४ घण्टामा १७१ जनाको पीसीआर परीक्षण गर्दा ४८ जनामा कोरोना पुष्टि भएको थियो ।

लुम्बिनी प्रादेशिक अस्पतालमा लगातार पाँचजना संक्रमितको मृत्यु

भरिन थाले अस्पतालहरु कोरोना सङ्क्रमितले