नेपालीहरुबाट स्वास्थ्य सुरक्षा मापदण्ड उल्लंघनको उजुरी

जापानमा नयाँ भेरियन्टसहितको कोरोना संक्रमण तीब्ररुपमा फैलिएको भए पनि नेपालीहरुले स्वास्थ्य सुरक्षा मापदण्ड पालना नगरेको भन्दै टोकियोस्थित नेपाली दूताबासले सचेत रहन आव्हान गरेको छ ।

दूताबासले एक विज्ञप्ति जारी गरी कोरोना संक्रमणबाट बच्न भीडभाडबाट टाढा रहने, मास्क लगाउने, दूरी कायम गने जस्ता सुरक्षा शतर्कता अपनाउनुपर्ने भए पनि केही नेपालीहरुले रेष्टरैन्टमा नाचगान र भीडभाड गरेको भन्दै त्यसतर्फ ध्यानाकर्षण गराएको हो ।

दूताबासले टोकियो र नागोया लगायतका स्थानहरुमा नेपालीहरुबाट संचालित केही रेष्टुरेन्टहरुमा नेपाली नागरिकहरु जमघट हुँदा मास्क नलगाउने, पेय पदार्थ सेवन गर्ने र नाचगान गर्ने जस्ता कार्य भएको जापान सरकारबाट जानकारीमा आएको जनाएको छ ।

दूताबासको जिज्ञप्तिमा स्वास्थ्य सुरक्षा मापदण्ड पालना नगरी कोरोना संक्रमणको जोखिम बढ्ने कार्य भैरहेको र यस्ता कार्य रोक्न जापानी परराष्ट्र मन्त्रालयबाट अनुरोध भएको जनाउँदै यस विषयमा सचेत हुन अनुरोध गरिएको छ ।