अमेरिकाको टेक्सास राज्यको ह्युष्टनमा आफ्नै अपार्टमेन्टमा गोली लागी मृत्यु भएकी २१ वर्षकी नेपाली विद्यार्थी मुना पाण्डेको हत्या अभियोगमा एक व्यक्ति पक्राउ परेका छन् ।
पाण्डेलाई गोली हानी हत्या गरेको अभियोगमा बबी सिंह शाह नाम गरेका व्यक्ति पक्राउ परेको र उनीबिरुद्ध हत्या अभियोग दर्ता गरिएको ह्युस्टन प्रहरीले जानकारी दिएको छ ।
अमेरिकाबाट प्रकाशन हुने खसोखास अनलाइनका अनुसार शाहलाई बुधबार बेलुका ८ बजे ट्राफिक स्टपमा पक्राउ गरिएको हो । प्रहरीले संदिग्धको बारेमा जानकारी सहित केही कलहरू प्राप्त गरेपछि पक्राउ गर्न सफल भएको हो ।
प्रहरीले बुधबार दिउसो संदिग्धको फोटो सार्वजनिक गरेको केही घण्टापछि शाहलाई पक्राउ गरेको हो । सीटीटिभी फुटेजबाट लिइएको फोटो अगस्त २४ शनिबार राती ९ बजेर ४८ मिनेटको थियो ।
परिवारमा एकमात्र सन्तान मिनाको शनिबारदेखि नै फोन अफ रहेकाले घटना शनिबार नै भएको हुनसक्ने आशंका गरिएको छ । तीन वर्षअघि अमेरिका पुगेकी मुनाको शव भदौ ११ गते मंगलबार उनी बस्ने अपार्टमेन्टमा भेटिएको थियो । मुनाको छातीमा तीन वटा गोली लागेको छ ।
मुना गएको शनिवारदेखि नै सम्पर्कविहीन भएकी थिइन् । अपार्टमेन्टका अधिकारीहरूले खबर गरेपछि पुगेका एम्बुलेन्सका डाक्टरहरूले जाँच गर्दा मुनाको त्यसअघि नै ज्यान गइसकेको पाइएको हो ।
मुनाले नै कोठामा राखेको सर्भिलेन्स क्यामेराको भिडियोमा उनलाई ओछ्यानमै गोली हानेको देखिएको र त्यसैको आधारमा अभियुक्त पक्राउ गरिएको हो ।
प्रतिक्रिया राख्नुहोस्