राष्ट्रिय अविष्कार केन्द्रले कृषि कारखानाको व्यवस्थापन र सञ्चालनको जिम्मा लिएको वीरगञ्ज कृषि औजार कारखानामा पाँच सय केभीए क्षमताको विद्युत् ट्रान्सफर्मर जडान गरिएको छ ।
उच्च क्षमताको विद्युतको अभावले विभिन्न समस्या झेल्नुपरेको बताउँदै आइरहेको थियो कारखानालाई बुधबार नेपाल विद्युत प्राधिकरण वितरण केन्द्र वीरगञ्जले नयाँ ट्रान्सफर्मर जडान गरेको हो ।
राष्ट्रिय अविष्कार केन्द्रका अध्यक्ष महावीर पुनले अबदेखि कृषि औजार कारखानाका लागि आवश्यकपर्ने विद्युत्को अभाव नहुने बताउनुभयो ।
“विगतमा ६५ केभीए क्षमताको विद्युत् अस्थायी लाइनले काम चलाउँदै आइरहेका थियौँ”, उहाँले भन्नुभयो, “अब कारखानाका लागि आवश्यकपर्ने विद्युत्को अभाव हुने छैन”, केन्द्रका अध्यक्ष पुनले ट्रान्सफर्मर जडानका लागि प्राधिकरणको रु १५ लाख र केन्द्रको १२ लाख खर्च भएको बताउनुभयो ।
केन्द्रले विगत २३ महिनादेखि कृषि औजार कारखानाको व्यवस्थापन र सञ्चालनको जिम्मेवारी लिएको हो । केन्द्रले हालसम्म करिब डेढ दर्जन कृषि औजार अनुसन्धान र विकास गरेको जनाएको छ ।
प्रतिक्रिया राख्नुहोस्