मानव तस्करलाई मोटो रकम बुझाएर बिनाभिसा अवैध किसिमले अमेरिका छिर्ने क्रममा सन् २०२३ को डिसेम्बरदेखि २०२४ को अगस्टसम्म २६६० नेपालीलाई अमेरिकी सिमा सुरक्षा गस्तीले पक्राउ गरेको छ ।
उनीहरुलाई विनाभिसा मेक्सिको हुँदै अमेरिका प्रवेश गर्ने क्रममा पक्राउ गरिएको अमेरिकी सरकारको डिपार्टमेन्ट अफ होमल्याण्ड सेक्युरिटीले जनाएको छ ।
होमल्याण्ड सेक्युरिटीका अनुसार २०२४ को जनवरीमा २०० जना, फेब्रुअरीमा २३० जना, मार्चमा १६०, अप्रिलमा ३१० र मे महिनामा १८० जना नेपालीहरु मेक्सिकोको सिमाक्षेत्रबाट विनाभिसा अमेरिका प्रवेश गरेका छन्
यसै गरी सन् २०२३ को अक्टोबरमा ६१० जना, नोभेम्बरमा ५५० जना र डिसेम्बरमा ४२० जना गरी अमेरिकाको चालु आर्थिक वर्षको ८ महिनामा २६६० जना नेपालीहरु विनाभिसा अमेरिका प्रवेश गरेका छन् । यो संख्या बाइडेनले सिमाक्षेत्रमा एसाइलममा प्रतिबन्धहरु लगाउनुभन्दा ठीक अगाडिको हो ।
स्मरणीय के छ भने २०१४ देखि २०२२ सम्म ९ वर्षको अवधिमा जम्मा ५१८० जना नेपालीहरु मेक्सिकोको सिमाक्षेत्रबाट विनाभिसा अमेरिका प्रवेश गरेका थिए ।
तर त्यसको तुलनामा २०२२ को अक्टोबरदेखिको २० महिनामा धेरै नेपालीहरु विनाभिसा अमेरिका प्रवेश गरेको तथ्यांक डिपार्टमेन्ट अफ होमल्याण्ड सेक्युरिटीले सार्वजनिक गरेको छ । जुन संख्या ५८ सय रहेको छ । यो संख्या केबल अमेरिका प्रवेशका क्रममा सिमा सुरक्षा गस्तीसँग जम्काभेट हुनेहरुकोमात्र हो ।
अघिल्लो आर्थिक बर्ष २०२३ मा अहिलेसम्मकै इतिहासमा सबैभन्दा धेरै ३१४० जना नेपालीहरु विनाभिसा मेक्सिकोको सिमाक्षेत्रबाट अमेरिका प्रवेश गरेका थिए ।
आर्थिक बर्ष २०२२ मा यसरी अमेरिका प्रवेश गर्ने नेपालीहरुको संख्या १४९० थियो भने २०२१ मा ४२० जना नेपालीहरुमात्र विनाभिसा अमेरिका प्रवेश गरेका थिए ।
अमेरिकाबाट प्रकाशन हुने खसोखास अनलाइनका अनुसार, बाइडेन प्रशासनमा ७ हजार २ सय १० नेपालीहरु विनाभिसा प्रवेश गरेका छन् । जबकी ट्रम्प प्रशासनको ४ बर्षमा १८५० जना नेपालीहरु विनाभिसा अमेरिका प्रवेश गरेका थिए ।
अर्थात् आर्थिक वर्ष २०१७ मा ६५०, २०१८ मा ७२०, २०१९ मा ३४० र २०२० मा १४० जना नेपालीहरु मेक्सिकोबाट विनाभिसा अमेरिका प्रवेश गरेका थिए ।
त्यस अगाडि २०१४ मा ४६०, २०१५ मा ४१०, २०१६ मा ५५० जना नेपालीहरु मेक्सिकोबाट विनाभिसा अमेरिका प्रवेश गरेका थिए । उनीहरु दलाललाई हजारौं डलर तिरेर विनाभिसा अमेरिका प्रवेश गर्ने क्रममा सिमा सुरक्षा गस्तीको जम्काभेटमा परेका हुन् ।
तीमध्ये कतिपय तत्काल अमेरिकामा रिहा भएका थिए भने कतिपयलाई अध्यागमन हिराशतमा राखिएको थियो । त्यसमध्ये केही अमेरिकाबाट देशनिकालामा समेत परेका छन् ।
प्रतिक्रिया राख्नुहोस्