जन सरोकार

“धर्मलाईभन्दा धनलाई जोड दिइनाले विश्वमा अशान्ति”

सनातन संस्कृति समाजका संरक्षक १००८ स्वामी स्वरूपानन्द सरस्वतीले आजभोलि धर्मलाईभन्दा धनलाई जोड दिइएकाले विश्वमा अशान्ति फैलिएको बताउँदै विश्वमा सनातनीहरु सबैको एकताले नै विश्वमा शान्ति र सद्भाव कायम हुने बताउनुभएको छ ।

भारतको पञ्जाबमा आयोजन हुने गुरु नानकको ५ सय ५० औँ जन्मोत्सवका अवसरमा नेपाल राष्ट्र बैंकबाट प्रकाशित रु १०० को सिक्का र पशुपतिनाथका मूलपुजारी गणेश भट्टले प्रदान गर्नुभएको पशुपतिनाथको चन्दन लिएर त्यसतर्फ जाने क्रममा पत्रकारहरुसंग उहाँले सो धारणा राख्नुभएको हो ।

नेपाल सरकारले मुद्रण गरेको रु १०० को सिक्काको एकातिर ‘ॐकार’ र अर्कातिर ‘नेपाल श्रीभवानी’ लेखिएको छ । जनस्तरको सम्बन्धलाई अझै प्रगाढ बनाउने उद्देश्यले नेपालीको सन्देश लिएर उहाँ त्यसतर्फ जान लाग्नुभएको उक्त समाजका उपाध्यक्ष धर्मराज बरालले बताउनुभयो ।

बेलहिया नाका हुँदै भारतको पञ्जाबतर्फ प्रस्थान गर्नुभएका स्वरुपानन्दले पत्रकारसँगको कुराकानीमा भन्नुभयो, “विश्वमा शान्ति कायम गर्न धर्म अङ्गीकार गर्नुपर्छ । हामी सनातनीहरु सबैको एकताले नै विश्वमा शान्ति र सद्भाव कायम हुन्छ ।”

धर्म जीवनको उन्नतिका लागि आवश्यक भए पनि पछिल्लो समय धर्मभन्दा धनलाई जोड दिइएकामा चिन्ता व्यक्त गर्दै उहाँले भन्नुभयो, “संसारमा सबै धर्म मनुष्यले बनाएका हुन् तर हिन्दू धर्म, सनातनी भएको र भगवानले नै सिर्जना गर्नुभएको हो । यसको न आदि छ न अन्त्य नै । यो अनादिसम्म चल्छ ।”

प्रतिक्रिया राख्नुहोस्

सम्बन्धित खबर

Back to top button