विदेशबाट नेपाल आउनेको पिसीआर रिपोर्ट नेगेटिभ भए मात्र पुग्ने गरेकोमा अब भने सरकारले विदेशबाट आउने व्यक्तिले अनिवार्य १४ दिन होम क्वारेन्टिनमा बस्नुपर्ने नीति पुनः कार्यान्वयन गर्न लागेको छ । यसअघि यस नीति भए पनि पछिल्लो समय कार्यान्वयनमा नआएको र विदेशबाट आएकाहरु निस्फिक्री शहर बजारमा डुलेको पाइएपछि यसलाई कडाई गर्न लागिएको हो ।
अब त्यसरी होम क्वारेन्टिनमा बस्नेहरुको अनुगमन समेत गरिने छ र यसका लागि टोलटोलमा अनुगमन टोली नै गठन भैरहेको छ । उक्त टोलीमा टोलका सक्रिय व्यक्ति, जनप्रतिनिधि र स्वास्थ्यकर्मी समेत हुनेछन् । त्यही टोलीले होम क्वारेन्टिनमा बसिरहेका विदेशबाट आएका व्यक्तिको प्रत्यक्ष निगरानी राख्नेछ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले हवाईमार्ग वा स्थलमार्ग भएर विदेशबाट आउने सबैले अनिवार्य १४ दिन क्वारेन्टिनमा बस्नुपर्ने जानकारी दिनुभएको छ ।
त्यस्तै मन्त्रालयका कोभिड फोकल पर्सन डा. महेन्द्रप्रसाद श्रेष्ठका अनुसार विदेशबाट आउने व्यक्तिलाई होम क्वारेन्टिनमा राख्नलाई अहिले टोलटोलमा निगरानी समूह गठन गर्ने काम भइरहेको जानकारी दिनुभएको छ । उक्त निगरानी समूह देशव्यापी रूपमै गठन गरिने पनि उहाँले बताउनुभयो ।
अहिले काठमाडौं उपत्यकाको स्थानीय तहहरूले निगरानी समूह गठन गर्ने काम गरिरहेको भन्दै उहाँले यस्ता समूह सबै स्थानीय तहहरूमा गठन गरिने जानकारी दिंदै श्रेष्ठले उपत्यकाको १८ वटै पालिकाहरूमा छलफल भइसकेको र कतिले समूह गठन गरिसकेका र कतिले गर्दै रहेको जानकारी दिनुभएको छ ।
विदेबाट फर्केकाहरुको होम क्वारेन्टिनमा बसे नबसेको निगरानी समूह गठन गर्नकै लागि मन्त्रालयले स्थानीय तहका प्रमुख र वडाध्यक्षसँग छलफल गरी निर्देशिका पनि दिएको र स्थानीय तहले सोही अनुसार काम गर्ने डा. श्रेष्ठले बताउनुभएको छ ।
डा. श्रेष्ठका अनुसार अब विदेशबाट आउने जो कोही पनि कम्तिमा दुई साता घरमै बस्नुपर्ने हुन्छ। सो अवधि पूरा नभई कोही पनि बाहिर निस्कन वा डुल्न पाउने छैनन् । सरकारले विदेशबाट आउने व्यक्तिलाई पिसिआर परीक्षणको नेगेटिभ रिपोर्ट अनिवार्य गरे पनि थप संक्रमण जोखिमलाई मध्यनजर गर्दै होम क्वारेन्टिनको नीति लिएको हो ।
होम क्वारेन्टिन बसाइको क्रममा लक्षण देखिए त्यस्ता व्यक्तिको पिसिआर परीक्षण गरिने छ भने लक्षण नदेखिए पनि ती व्यक्तिहरूको एन्टिजेन विधिबाट परीक्षण गरिने छ । त्यसरी पुनः परीक्षण गर्दा संक्रमण पुष्टि भए आवश्यकता अनुसार अस्पताल पुर्याउने काम पनि उक्त समूहले नै गर्ने भनिएको छ ।
प्रतिक्रिया राख्नुहोस्