डच स्ट्राइकर रोबेन भान पर्सिको ह्याट्रिकले म्यान्चेस्टर युनाईटेडले इङ्लिश प्रिमियर लिग अन्तर्गत आइतबार भएको खेलमा साउथाम्प्टनलाई ३-२ गोल अन्तरले पराजित गरेको छ ।

साउथाम्प्टनले खेलको शुरुवातमा युनाईटेडलाई निकै दबाबमा राखेको थियो । खेलको १६ औ मिनेटमा रिकी ल्याम्बर्टले गरेको गोलले साउथाम्प्टनले अग्रता लिएको थियो तर अग्रता धेरै बेर कायम रहन सकेन । खेलको २३ औ मिनेटमा भान पर्सीले गोल गरेर म्यान्चेस्टर युनाईटेडलाई बराबरीको स्थितीमा पुर्‍याए । खेलको दोश्रो हाफको शुरुमै मोर्गनले गोल गर्दै साउथाम्प्टनलाई पुन अग्रता दिलाए । त्यसपछि म्यान्चेस्टर युनाईटेड निकै दबाबमा देखियो । यसै बिच पाएको पेनाल्टीमा समेत भान पर्सिले गोल गर्न नसक्दा चौतर्फी दबाबको स्थिती सिर्जना भैरहेको थियो । तर खेलको निर्धारित समय समाप्त हुन भन्दा ३ मिनेट पहिला भान पर्सी कै गोल मार्फत म्यान्चेस्टर युनाईटेडले खेल पुन बराबरीमा पुर्‍यायो । र थपिएको अतिरिक्त ३ मिनेट बिच अन्तिम गोल गर्दै पुर्व आर्सनलका स्ट्राइकरले म्यान्चेस्टर युनाईटेडलाई जित दिलाए ।

यसै सिजन किर्तिमानी रकममा आर्सनलबाट म्यान्चेस्टर युनाईटेड आएका भान पर्सी आफ्नो टोलीका लागि आइतबारको खेलका सही नायक साबित भए । उता आइतबार नै भएको अर्को ठुलो खेलमा लिभरपुल आर्सनलसँग २-० ले पराजित भयो । आर्सनलका लागि जर्मन खेलाडी पोडोल्स्कीले काजोरियाले गोल गरेका थिए । हारसगै लिभरपुलले यो सिजनको अहिले सम्म एउटा पनि खेल जितेको छैन ।