मलेसियामा आजबाट सुरु भएको आइसीसी वर्ल्ड क्रिकेट लिग डिभिजन फोरमा नेपालले विजयी सुरुवात गरेको छ । डिभिजन थ्रीमा उक्लने लक्ष्यका साथ मलेसिया पुगेको नेपालले आज भएको आफ्नो पहिलो खेलमा सिङ्गापुरलाई ५ विकेटले पराजित गरेको छ ।

टस जितेर पहिले व्याटिङ थालेको सिङ्गापुरले ३९ दशमलव ५ ओभरमा सबै विकेट गुमाएर १ सय १२ रन बनाएको थियो ।

नेपाली बलरहरु चम्किएपछि दबावमा आएको सिंगापुरका लागि अनिश परामले ३१ रन जोड्नु बाहेक अन्यले राम्रो प्रदर्शन गर्न सकेनन् । नेपालका अमृत भट्टराईले ४ विकेट लिए भने बसन्त रेग्मीले ३, सन्जम रेग्मीले २ र शक्ति गौचनले १ विकेट लिए । सिङ्गापुरले प्रस्तुत गरेरको १ सय १२ रनको लक्ष्य नेपालले २४ दशमलव ५ ओभरमा ५ विकेटको क्षतिमा भेट्टायो ।

नेपालको सुरुवात भने निकै खराब थियो । शुन्य रनमा अनिल मण्डललाई पहिलो विकेटका रुपमा गुमाएको नेपालको स्कोर बोर्डमा १६ रन हुँदा ज्ञानेन्द्र मल्ल व्यक्तिगत १२ रनमा पभेलियन फर्किएका छन् । पारस खड्का व्यक्तिगत ५ रन र सुभास खकुरेल ९ रनमा आउट भएपछि स्कोरबार्डमा २९ रन हुँदा नेपालले महत्वपूर्ण ४ जना गुमाइसकेको थियो ।

स्कोर बोर्डमा ४७ रन हुँदा शरद भेसवाकर पनि व्यक्तिगत ९ रनमा नै आउट भएपछि नेपाली टोली थप दबावमा आयो । तर, शक्ति गौचन र प्रदीप ऐरीले ६५ रनको साझेदारी गर्दै नेपाललाई महत्वपूर्ण जित दिलाए । ऐरी ३४ र गौचन १८ रनमा अविजित रहे ।

राउन्ड रोबिन लिगका आधारमा खेलिने डिभिजन फोर प्रतियोगितामा नेपालसँगै सिंगापुर, मलेसिया, अमेरिका, डेनमार्क र तान्जनिया सहभागी छन् । प्रतियोगिताको शीर्ष २ स्थानमा रहने टोली डिभिजन थ्रीमा उक्लनेछन् भने पुछारका २ टोली डिभिजन फाइभमा झर्नेछन् ।

बर्ल्डकप खेल्ने सपना लिएको नेपालले प्रतियोगितामा शीर्ष दुईमा रहँदै डिभिजन थ्रीमा उक्लने लक्ष्य लिएको छ । नेपालले अब भदौ १९ गते तान्जिनियासँग, २१ गते मलेसियासँग, २२ गते अमेरिकासँग र २४ गते डेनमार्कसँग प्रतिस्पर्धा गर्नेछ ।