मकवानपुरगढीको विजयोत्सवमा राष्ट्रपति भण्डारी, ऐतिहासिक महत्व जोगाउन आव्हान

बङ्गालका मिरकासिमको फौजलाई गोरखाली सेनाले पराजय गरेको ऐतिहासिक मकवानपुर गढीमा विजयोत्सव मनाइएको छ ।

विसं १८१९ माघ १० गते गुरगिन खाँको नेतृत्वमा रहेको मुसलमानी फौजलाई गोरखाली फौजले जिती मकवानपुर हात लागेको थियो ।

दुई सय ५६ औंँ विजयोत्सवका उपलक्ष्यमा मकवानपुर गढी गाउँपालिकाले बिहिबार आयोजना गरेको विजयोत्सव कार्यक्रममा राष्ट्रपति विद्यादेवी भण्डारीले देशको ऐतहासिक महत्व बोकेको र विशेष महत्वपूर्ण धरोहर भएको बताउनुभएको छ ।

सो अवसरमा राष्ट्रपति भण्डारीले गढी परिसरमा राष्ट्रिय झण्डोत्तोलन गर्दै नेपाल एकीकरण अभियानमा अति महत्वपूर्ण भूमिका निर्वाह गरेको स्थान मकवानपुर गढीको संरक्षण गरिनुपर्नेमा जोड दिनुभयो ।

कार्यक्रममा राष्ट्रपतिले भन्नुभयो, “नेपाली सेनाले विदेशी सेनालाई पराजित गरेको यो गढीलाई सरकारले नेपालको पर्यटकीय गन्तव्यहरुको सूचीमा समावेश गरेर गढीको पर्यटकीय विकास गर्न पहल गर्नुपर्छ ।” राष्ट्र निर्माणमा संलग्न पूर्वजहरुको योगदानको स्मरण गर्दै राष्ट्रपति भण्डारीले नेपालले कहिल्यै कसैको उपनिवेश बन्नु नपरेकामा गर्व गर्नुपर्ने बताउनुभयो ।

मकवानपुरगढी क्षेत्रमा रहेको वनजङ्गलको संरक्षण गर्न आग्रह गर्दै राष्ट्रपति भण्डारीले मकवानपुरका प्राकृतिकलगायत सम्पूर्ण सम्पदा र स्रोतको सम्बद्र्धनमार्फत पर्यटन विकास गर्न आह्वान गर्नुभयो ।

कार्यक्रममा प्रदेश नं ३ का मुख्यमन्त्री डोरमणि पौडेलले प्रदेशको ऐतिहासिक सम्पत्ति मकवानपुरगढीको संरक्षणमा जोड दिइने प्रतिबद्धता व्यक्त गर्दै मकवानपुर गढीको पुनःनिर्माणमा प्रदेशले बजेट विनियोजन गरेको जानकारी दिनुभयो । जिल्ला समन्वय समिति मकवानपुरका प्रमुख रघुनाथ खुलालले मकवानपुर गढीको संरक्षणमा सबैले जोड दिनुपर्ने बताउनुभयो ।

मकवानपुर गढी गाउँपालिकाका अध्यक्ष विदुर हुमागाईँले मकवानपुरगढीको संरक्षण, सम्बद्र्धन र पर्यटकीय विकासमा गाउँपालिकाले चाल्ने कदममा सहयोग गरिदिन सबैमा अनुरोध गर्नुभयो ।

आज गोर्खा मुगलयुद्धको २५६ वर्ष : मकवानपुरगढी विजयोत्सव मनाइँदै