कञ्चनपुर घटनाका घाइतेको उपचार सरकारले गर्ने

बलात्कार र हत्याको बिरोधमा कञ्चनपुरमा भएको बिरोध प्रदर्शनका क्रममा घाइते भएकाहरुको उपचार सरकारले गर्ने भएको छ ।

गृहमन्त्री रामबहादुर थापाले कञ्चनपुर घटनामा परेर घाइते भएका आन्दोलनकारीको स्वास्थ्योपचार सरकारले गर्ने बताउनुभएको हो ।

कञ्चनपुरमा आन्दोलनका क्रममा घाइते भएर त्रिभुवन शिक्षण अस्पतालमा उपचार गराइ राखेका अर्जुन भण्डारालाई अस्पतालमा भेटेर स्वास्थ्य अवस्थाबारे जानकारी लिँदै आन्दोलनको क्रममा घाइते भएकाको उपचार सरकारले गर्ने बताए ।

बलात्कारपछि हत्या भएकी निर्मला पन्तको हत्यारालाई खोजी कारबाही गर्नुपर्ने मागसहित आन्दोलन गर्दा भण्डारासहित थुप्रै आन्दोलनकारी घाइते भएका थिए ।

गृह मन्त्रालयले बिहीबार मात्र पन्तको हत्याबारे अनुसन्धान गर्न गृह मन्त्रालयका सहसचिव हरिप्रसाद मैनालीको संयोजकत्वमा पाँच सदस्यीय उच्चस्तरीय छानबिन समिति गठन गरेको थियो ।

बिहिबार बिरोध प्रदर्शनका क्रममा प्रहरीले गोली चलाउँदा चारजना घाइते भएका थिए ।