विशेष महाधिवेशनबाट आफूलाई नेपाली कांग्रेसको आधिकारिक सभापति भएको दावीसहित गगन थापाले निर्वाचन आयोगमा अद्यावधिकका लागि निवेदन दिएको भोलिपल्ट शेरबहादुर देउवा पक्ष पनि आयोग पुगेको छ ।
शुक्रबार देउवा सभापति रहनुभएको कांग्रेसका कार्यवाहक सभापति पुर्ण बहादुर खडकाले ८ सय ८५ जना महाधिवेशन प्रतिनिधिले विशेष महाधिवेशन मागका लागि गरेको हस्ताक्षर फिर्ता लिएको फाइल बुझाउनुभएको छ ।
कार्यवाहक सभापति खड्काले १४ औं महाधिवेशनमा निर्वाचित केन्द्रीय कार्यसमिति नै कांग्रेसको आधिकारिक भएको जिकिर गर्दै विशेष महाधिवेशन अल्पमतमा रहेको दावीसहित कार्यवहाक प्रमुख निर्वाचन आयुक्त राम प्रसाद भण्डारीलाई बुझाउनुभख्एको छ ।
विशेष महाधिवेशनबाट कांग्रेसको सभापतिमा निर्वाचित हुनुभएका गगन कुमार थापा,उपसभापति विश्वप्रकाश शर्मा,महामन्त्रीद्वय गुरूराज घिमिरे र प्रदिप पौडेल समुहले हिजो माघ १ गते आफ्नो समुहलाई आधिकारिक कांग्रेसको माग गर्दै निवेदन दर्ता गराउनुभएको थियो ।
त्यस क्रममा खड्काले आयोगका पदाधिकारीसामु गगन थापा नेतृत्वको नेपाली कांग्रेस निर्वाचन आयोग पुग्नुलाई लोकतन्त्रमाथिको षडयन्त्रको संकेतका रूपमा अर्थ्याउनुभएको छ ।
त्यस क्रममा खड्काले भन्नुभयो, :नेपालको संविधानमाथि, नेपालको लोकतन्त्रमाथि, नेपालको हामीले गरेको परिवर्तनमाथि जुनखालको गम्भीर षडयन्त्रका संकेतहरू देखिन थालेका छन् । त्यही षडयन्त्रको ठूलो संकेतको रूपमा निर्वाचन आयोगमा आएर केही व्यक्तिहरूले हामी कांग्रेसको दाबा गर्न आयौं भनेर सञ्चार माध्यमबाट जानकारी पायौं ।”
प्रतिक्रिया राख्नुहोस्