पछिल्ला घटनाक्रमका बीच संयुक्त राज्य अमेरिका र इरानका प्रतिनिधिहरू बिहीबार संयुक्त राष्ट्रसङ्घ सुरक्षा परिषद्को आपत्कालीन बैठकमा सहभागी भएका छन् ।
बैठकमा इरानमा देखिएको अवस्थाबारे गम्भीर चासो व्यक्त गर्दै अमेरिकी पक्षले आवश्यक सबै विकल्पहरू विचाराधीन रहेको जनाएको छ ।संयुक्त राष्ट्रसङ्घका लागि अमेरिकी राजदूत माइक वाल्ट्जले परिषद्लाई सम्बोधन गर्दै राष्ट्रपति डोनाल्ड ट्रम्प परिस्थितिको नजिकबाट मूल्याङ्कन गरिरहेको र नागरिक सुरक्षालाई प्राथमिकतामा राख्दै उपयुक्त कदम चाल्ने तयारीमा रहेको बताउनुभयो ।
उहाँले इरानमा देखिएको हिंसा रोक्न अन्तर्राष्ट्रिय समुदायको साझा प्रयास आवश्यक रहेकोमा जोड दिनुभयो । मानवअधिकारसम्बन्धी संस्थाहरूका अनुसार हालैका प्रदर्शनका क्रममा ठूलो सङ्ख्यामा मानवीय क्षति भएको बताइएको छ ।
यद्यपि इरान सरकारले आधिकारिक विवरण सार्वजनिक नगरेकाले यथार्थ अवस्था अझै स्पष्ट हुन सकेको छैन । हाल प्रदर्शनहरू कम हुँदै गएको देखिए पनि सुरक्षासम्बन्धी व्यवस्था र सञ्चार सीमितता यथावत् रहेको जनाइएको छ ।
बैठकमा इरानका उपराजदूत होसेन दरजीले आफ्नो धारणा प्रस्तुत गर्दै आन्तरिक घटनाक्रममा बाह्य हस्तक्षेप भएको आरोप अस्वीकार गरे र अन्तर्राष्ट्रिय समुदायलाई इरानको सार्वभौमिकताको सम्मान गर्न आग्रह गर्नुभयो ।
यस अवसरमा इरानी नागरिक अधिकारका पक्षधर मसीह अलिनेजाद र अहमद बतेबीले पनि परिषद्मा आफ्ना अनुभव साझा गर्दै मानवअधिकारको संरक्षणका लागि थप अन्तर्राष्ट्रिय ध्यान आवश्यक रहेको बताउनुभयो ।
यसैबीच, क्षेत्रीय मुलुकहरूले सम्भावित सैन्य कदमले मध्यपूर्व क्षेत्रको स्थायित्व र विश्व अर्थतन्त्रमा प्रभाव पार्न सक्ने भन्दै संयमता अपनाउन आग्रह गरेका छन् । यता, संयुक्त राज्य अमेरिकाले मानवअधिकार उल्लङ्घनसँग सम्बन्धित आरोपमा केही इरानी अधिकारीहरूमाथि लक्षित प्रतिबन्ध घोषणा गरेको छ ।
विश्लेषकहरूका अनुसार हाल इरानको अवस्था केही शान्त देखिए पनि कूटनीतिक संवाद र अन्तर्राष्ट्रिय समन्वय अझै महत्वपूर्ण बनेको छ ।
प्रतिक्रिया राख्नुहोस्