नेपाली कांग्रेसको विशेष महाधिवेशनबाट चयन भएको गगन थापा समूहलाई आधिकारिकता दिने निर्वाचन आयोगको निर्णयविरुद्ध शेरबहादुर देउवा पक्षले सर्वोच्च अदालतमा रिट दर्ता गराएलगत्तै निर्वाचनका तालिका रोक्ने माग लिएर आयोग जाने भएको छ ।
आइतबार कांग्रेस नेताद्वय देउवा र पूर्णबहादुर खड्काका वारेस श्रवणकुमार श्रेष्ठले दायर गर्नुभएको रिटको प्रारम्भिक सुनुवाइ आगामी मङ्गलबार हुनेछ ।
रिटमा गगन–विश्व समूहलाई मान्यता दिने निर्वाचन आयोगको निर्णय बदर गरिनुका साथै ४ आगामी मंगलबारलाई तोकिएको प्रतिनिधिसभाको प्रत्यक्षतर्फको मनोनयन स्थगित हुनुपर्ने माग गरिएको छ ।
सोही रिटको प्रति लिएर देउवा समूह निर्वाचन तालिका स्थगन गर्न माग गर्दै आयोग जानेछ । देउवा समूहका नेता मीनबहादुर विश्वकर्माका अनुसार पार्टी मुख्यसचिव र पूर्वमहान्यायाधिवक्ता खम्मबहादुर खाती निर्वाचन आयोग जानुहुनेछ ।
विश्वकर्माका अनुसार सर्वोच्चमा दायर गरेको रिटको प्रमाणित पत्र लिएर निर्वाचन आयोग जानुहुन्छ । स्मरणीय छ, फागुन २१ गते हुने निर्वाचनका लागि माघ ६ गते मनोनयनको तालिका छ ।
प्रतिक्रिया राख्नुहोस्