दुई दशकभन्दा लामो समयदेखि निर्माण थालिएको मेलम्ची खानेपानी आयोजनाको पानी काठमाडौं झर्ने दर्जनौं तारिख पूरा नभैरहेका बेला अब असार मसान्त भित्र काठमाडौंमा पानी आउने दावी खानेपानी मन्त्रालयले गरेको छ । विहीवार श्वेत पत्र जारी गर्दै आयोजनाको कामम ९५.१२ प्रतिशत सम्पन्न भएकाले असार मसान्तमा पानी झर्ने दावी गरेको हो ।
श्वेतपत्र जारी गर्दै खानेपानी मन्त्री बिना मगरले निर्माण कार्य तीव्र गतीमा अगाडि बढेकोले सरकारले भनेको समयमै काम सम्पन्न हुने जानकारी दिनुभयो । विगतमा सरकारले बाचा गरे अनुसार काम गर्न नसकेको स्मरण गराउदैं अब तोकेकै समयमा काठमाडौंमा पानी आउने बताउनुभयो ।
त्यसै गरी खानेपानी मन्त्रालयका सचिव माधव बेल्बासेले निर्माणको काममा अनुगमन राम्रो सँग भएको जानकारी दिंदै विगतका कमी कमजोरी पाठ सिकेर मन्त्रालयले काम गरेको जानकारी दिनुभयो । सचिव बेल्बासेले कुनै दैविक प्रकोप नआए असार समान्तभित्र पानी काठमाडौंमा आउने स्पष्ट पार्नुभयो ।
मेलम्ची खानेपानी विकास समितिका कार्यकारी निर्देशक ई। तिरेशप्रसाद खत्रीले निर्माण कम्पनीहरुलाई सम्झौता अघि काम गर्न गरी काम अगाडि बढाएको बताउनुभयो । कार्यकारी निर्देशक खत्रीले आयोजनाको हालसम्म २७ अर्ब ९४ करोड खर्च भइसकेको जानकारी दिनुभयो ।
याङ्ग्री लार्केको पानी ल्याउने बाटो खुल्यो
मेलम्ची खानेपानी आयोजनाको दोस्रो चरणअन्तर्गत याङ्ग्री लार्के आयोजना कार्यान्वयन गर्ने सिलसिलामा पाँचपोखरी थाङपाल गाउँपालिकासँग सम्झौता सम्पन्न भएको छ । पहिलो चरणमा १७ करोड लिटर पानी ल्याउने काम करीब सम्पन्न हुने दौरानमा रहेको छ ।
दोस्रो चरणअन्तर्गत ३४ करोड लिटर पानी काठमाडौँ उपत्यकामा ल्याउँदा प्रभावित हुने स्थान र जनताले के–के सुविधा पाउने भन्ने विषयमा केही विवाद कायम थियो । अब त्यो विवाद अन्त्य भएपछि सहमतिपत्रमा हस्ताक्षर गर्ने काम सम्पन्न भएको छ ।
दुवै नदीबाट पानी पठाएवापत प्रभावित जनताले पाउने सुविधाका सम्बन्धमा गाउँपालिका र सरोकार समितिकातर्फबाट नौ वटा माग प्रस्तुत गरिएको र ती माग पूरा गर्न समितिले सहमति जनाएपछि यो अवस्था सिर्जना भएको छ । आयोजना कार्यान्वयन गर्दा स्थानीय सरकार तथा समुदायमा विश्वासको वातावरण सिर्जना हुने र आयोजना समयमै सम्पन्न हुने आधारशिला तय हुने उदेश्यले मेलम्ची खानेपानी विकास समितिका तर्फबाट समितिका कार्यकारी निर्देशक तिरेशप्रसाद खत्री र गाउँपालिका अध्यक्ष टासी लामाबीच सोही क्षेत्रका सांसद शेरबहादुर तामाङ र सामाजिक विकासविज्ञ शम्भुप्रसाद कट्टेलको रोहबरमा सो सम्झौतापत्रमा हस्ताक्षर गरिएको हो ।
याङ्ग्री लार्के सरोकार समिति, गाउँपालिका र समितिबीच पटक–पटक भएको छलफलपश्चात यो सम्झौता भएपछि अब दोस्रो चरणको कामले गति लिने र समयमै आयोजना सम्पन्न हुनेमा सम्बद्ध पक्ष ढुक्क देखिएको छ ।
