राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहले पूर्वी तराईका शहरमा पहाडी क्षेत्र तेह्रथुमम, पाँचथर, भोजपुरका तरकारी आउनुपर्ने बताउनुभएको छ ।
मंगलबार इटहरीमा रास्वपाले आयोजना गरेको चुनावी सभामा बोल्दै बालेनले उपस्थिहरुलाई ‘खाना खानुभो, तरकारी कहाँको खानु भो, सीमापारीको त होला’ भन्दै तेह्रथुम, पाँचथरतिरको तरकारी खाने वातावरण बनाउनुपर्ने बताउनुभएको हो ।
पूर्वी नेपालको सम्भावनाको बयान गर्दै बालेनले संस्कृति, सम्पदाले भरिएको यो क्षेत्रको समग्र विकास हुनुपर्ने र सकिने बताउँदै उद्योग स्थापना गर्न नेताहरूकोमा धाउनुपर्ने र सञ्चालनपछि चन्दा दिनुपर्ने अवस्थाको अन्त्य गर्ने बताउनुभयो ।
पूर्वी क्षेत्र देशकै पहिलो उद्योग–कलकारखाना स्थापना भएको बताउँदै बालेनले खाने तेलदेखि मरमसलासम्मका उद्योग भए पनि नयाँ उद्योगहरु भने खुल्न नसकेको बताउनुभयो ।
सम्बोधन गर्दै बालेनले भन्नुभयो, “हाम्रो पूर्वलाई देखाएर पनि पैसा कमाउन सकिन्छ, यहाँ उब्जाउ गरेर पनि पैसा कमाउन सकिन्छ । किराँतहरुको आस्थाको केन्द्र मुकुलुङ, खुवालुङ जस्ता ठाउँहरुलाई ७७ वटै जिल्लाका नेपालीले आस्था राख्न पाउन् । समस्याहरु धेरै छन्, समाधान पनि यहीँ छ । समस्या र समाधानलाई भेटाउने काम भएको छैन, त्यो भेटाउने काम गर्न चाहन्छ, हाम्रो पार्टीले ।”
प्रतिक्रिया राख्नुहोस्